U subotu 28 maja žanočaja kamanda «Viciebska» rychtavałasia da vyjezdu na niadzielnuju hulniu suprać bresckaha «Dynama». Na poŭdzień Biełarusi kamanda mieła namier dabiracca ciahnikom — kłubnyja aŭtobusy zaniali mužčynskija składy, jakija hety ŭik-end pravodziać u Salihorsku. Vyjezd byŭ pryznačany na čas kala troch nočy ŭ niadzielu, tamu niekatoryja futbalistki vyrašyli nie kłaścisia adpačyvać doma, a ŭžo vyspacca ŭ kupe pa darozie ŭ Brest. Dzieviaci hadzin u darozie dla hetaha pavinna było chapić. Inšaharodnija futbalistki «Viciebska», jak i vychavancy maładziožnych kamand, žyvuć u adnoj ź miascovych haścinic. Mienavita tam uviečary suboty adbylisia trahičnyja padziei, piša «Trybuna».
Što zdaryłasia
Hrodziency Karalinie Ramančuk, jakaja znachodziłasia ŭ hateli, u rajonie vaśmi hadzin viečara niečakana stała drenna. Dziaŭčyna straciła prytomnaść i pierastała dychać. Pry hetym u jaje pramacvaŭsia puls. Nieŭzabavie cieła z-za niedachopu kisłarodu pasinieła, i Karalina pamierła. Ludzi, jakija znachodzilisia pobač, adrazu ž vyklikali chutkuju dapamohu, adnak, na ich dumku, jana jechała vielmi doŭha.
Daktary zmohuć adkazać na hetaje pytańnie ŭ paniadziełak, kali praviaduć uskryćcio.
Čym viadomaja Ramančuk
13 lutaha Karalinie spoŭniłasia 22 hady. Ramančuk pačynała futbolny šlach u DIUSŠ SVK «Prahres-Vierciališki» ŭ treniera Michaiła Charytaniuka. U 2016-m u składzie zbornaj Biełarusi U-17 zhulała va ŭsich troch matčach kvalifikacyi ČIE-2017. U nastupnym hodzie Karalina na darosłym uzroŭni debiutavała ŭ składzie «Niomana», za jaki vystupała da kanca 2020-ha. Za hety čas abaronca dvojčy vyjhravała bronzu čempijanatu Biełarusi (2019, 2020 hady), pravioŭšy za hrodzienak 60 matčaŭ žanočaj lihi i zabiŭšy adzin miač.
Na pačatku 2021-ha Ramančuk padpisała kantrakt z tolki stvoranaj žanočaj kamandaj «Viciebska». U debiutnym dla siabie čempijanacie «Viciebsk» finišavaŭ siomym ź dziesiaci. Ramančuk stała lidarkaj kamandy pa kolkaści chvilin na poli.
U biahučym siezonie Karalina zhulała va ŭsich vaśmi matčach «Viciebska», stabilna źjaŭlajučysia ź pieršych chvilin.
Tak supała, što mienavita Karalinu vyjavili na kłubnaj afišy, anansujučy niadzielny matč suprać bresckaha «Dynama».
Dyrektar zahadaŭ hulać na nastupny dzień
Paśla śmierci futbalista ŭ kamand pryniata nie hulać matčy, zapłanavanyja na najbližejšyja dni. Zvyčajna treniery dajuć niekalki sutak padapiečnym na toje, kab ačuniać.
Adnak dyrektar «Viciebska» Mikałaj Vajciuchoŭski navat nie staŭ pytacca pra mierkavańnie žanočaj kamandy i zahadaŭ jechać na niadzielnuju hulniu suprać «Dynama». Dyrektar arhumientavaŭ svajo rašeńnie tym, što «kamanda jedzie nie na viasielle», a značyć, nie budzie viesialicca tam, tamu, maŭlaŭ, usio ŭ paradku.
Ale ŭsio ž kančatkovaje rašeńnie pa vyjeździe ŭ Brest futbalistki prymali sami. Hałoŭny trenier Antuan Majoraŭ nie prymušaŭ padapiečnych jechać na hulniu, ale paprasiŭ kamandu kalektyŭna vyznačyć — ci jeduć usie, ci nie jedzie nichto. Dziaŭčaty, jakija sabralisia na vakzale, vyrašyli ŭsio ž sieści ŭ ciahnik i hulać suprać «Dynama». Dva inšyja niadzielnyja matčy žanočaj lihi taksama vyrašyli nie pieranosić.
Nie pieršaja śmierć u «Viciebsku»
Apošnija hady z futbolnaha Viciebska z častatoj, jakaja pałochaje, prychodziać trahičnyja viestki.
17 śniežnia 2018 hoda ŭ aŭtakatastrofie pad Tałačynom zahinuli bramnik Andrej Ščarbakoŭ, jaho žonka i adno z dvuch dziaciej. Paśla rasśledavańnia siłaviki zrabili vysnovu, što 27-hadovy futbalist adciahnuŭ uvahu padčas kiravańnia aŭtamabilem, pry hetym nie parušajučy chutkasny režym, na śpidomietry było 113 km/h pry dazvolenych 120 km/h.
11 krasavika 2020-ha na 31-m hodzie žyćcia paśla praciahłaj chvaroby pamior były pres-sakratar «Viciebska» Juryj Burakin. Jon byŭ viadomy tym, što byŭ zvolnieny paśla hnieŭnaha kamientaryja na adras kiraŭnika ABFF Uładzimira Bazanava.
U noč z 5 na 6 červienia 2021 hoda patanuŭ 20-hadovy napadajučy «Viciebska» Kielvin Adenihba. Nihieryjec pajšoŭ kupacca ŭ voziery. Kali Kielvin skoknuŭ ź pirsa i nie vypłyŭ, siabry zabili tryvohu i pačali jaho šukać. Ratavalniki znajšli cieła Adenihba ranicaj 6 červienia.
U listapadzie minułaha hoda Dzianisa Koŭbu, jaki da pačatku 2021-ha pracavaŭ u trenierskim štabie «Viciebska», špitalizavali ŭ maskoŭskuju infiekcyjnuju lakarniu №2 z dyjahnazam COVID-19. Daktaram vyratavać 42-hadovaha eks-hulca zbornaj Biełarusi nie ŭdałosia.
Kamientary