Prahałasavała daterminova — raptam vajna. Što pisali pra vajnu Kanapackaja, Dźmitryjeŭ i Čeračań?
Usie jany vykazalisia suprać vajny — akramia adnaho palityka. Zdahadajciesia, jakoha.
Andrej Dźmitryjeŭ u sacsietkach časta publikuje videa pra aktualnyja padziei ŭ Biełarusi. Na nastupny dzień paśla pačatku bajavych dziejańniaŭ va Ukrainie były kandydat u prezidenty apublikavaŭ post, u jakim napisaŭ, što Biełaruś nie pavinna ŭdzielničać u vajnie.
«Važna vykazvacca, što Biełaruś nie musić być častkaj vajny. Ni jak terytoryja, ź jakoj viaducca bajavyja dziejańni, i tym bolš ni jak paŭnacenny ŭdzielnik. Našych vajskoŭcaŭ, terminovaj słužby i kantraktnikaŭ, va Ukrainie być nie pavinna. Vykazacca možna ŭ sacyjalnych sietkach, u zvarocie da vašaha deputata ci da Ministerstva abarony. Budźcie vietlivyja, prybiarycie emocyi, ale niachaj vaša pazicyja budzie vielmi jasnaja. A jašče pišycie słovy padtrymki vašym siabram, znajomym va Ukrainie i tym u Rasii, chto vystupiŭ suprać vajny. Ciapier dla hetaha patrebnaja śmiełaść. A nam treba farmavać internacyjanalny ruch suprać vajny. I apošniaje.
Ja ščyra liču, što biełarusy nie pavinny vinavacić siabie ŭ dziejańniach ułady. Vy ŭžo zrabili vielmi šmat, kab pakazać, što hetyja dziejańni da hramadstva, ludziej, mirnych biełarusaŭ i ich voli nie majuć dačynieńnia. Tak što vam niama za što być vinavatymi, niama čaho saromiecca.
Našy kaštoŭnaści i pierakanańni padviarhajucca napadu, ale my zastajemsia saboj. I prostyja dziejańni dapamohuć u hetym. Bieražycie siabie», — pisaŭ jon.
Taksama Andrej Dźmitryjeŭ vykazvaŭsia nakont refierendumu pa Kanstytucyi. Jon nazyvaŭ jaho «piar-akcyjaj».
«Refierendum u Biełarusi i da hetaha byŭ nie asabliva cikavy, zastajučysia pijar-akcyjaj i śpiecapieracyjaj ułady, a ciapier jaho ŭvohule zmyła inšym paradkam dnia. Mienavita pazicyja Łukašenki pa DNR, ŁNR budzie vyznačać važnyja pytańni ŭ budučyni, a nie zaduma z UNS. Jana stała zusim pustoj», — pisaŭ jon.
Hanna Kanapackaja ŭvohule vyrašyła nie vykazvacca nakont vajny. Adzinaja nievialikaja zhadka pra padziei jość ŭ jaje apošnim paście: palityk mierkavała, što z-za vajny mohuć pieranieści refierendum. Heta stała adnoj z pryčyn, čamu Kanapackaja prahałasavała daterminova.
«Isnuje vierahodnaść pieranosu dnia asnoŭnaha hałasavańnia ŭ suviazi z padziejami, jakija adbyvajucca ciapier pamiž Rasijaj i Ukrainaj, jakija ŭ haračaj fazie svajho narastajučaha supraćstajańnia ŭ abaviazkovym paradku zakranuć i Biełaruś», — pisała jana 22 lutaha.
Kryž Kanapackaja pastaviła ŭ hrafie «suprać».
«Prapanavanyja na refierendum źmieny ni nakolki nie prasunuć nas u pytańniach pabudovy nacyjanalnaj pravavoj dziaržavy i cyvilizavanaha demakratyčnaha hramadstva. U biahučym stanie biełaruskaha socyumu i vybudavanaj struktury dziaržaŭnaj ułady dziejnaja redakcyja Kanstytucyi arhaničnaja i žyćciazdolnaja. Navat uklučeńnie ŭ źmieny niekatorych pałažeńniaŭ, raspracavanych našym «Hramadskim centram zakanadaŭčych inicyjatyŭ», nie admianiajuć majho rašeńnia hałasavać suprać.
Z karysnaha, što pryniasie refierendum: kaniečnie ž, bolš-mienš dakładnaje ŭjaŭleńnie pra kolkaść prychilnikaŭ źbiehłych štaboŭ, jakija zastajucca biezumoŭnaj hrupaj ŭpłyvu, addeanoniŭšy siabie sapsavanymi biuleteniami.
Pakolki niesapraŭdnyja biuleteni (u tym liku i «z dvuma kryžami») padličvajucca, sumujucca i publikujucca CVK, aryfmietyka hetaja budzie vielmi krasamoŭnaj», — pisała jana.
Siarhiej Čeračań paśla refierendumu napisaŭ svajo mierkavańnie nakont Kanstytucyi i vajny. Były kandydat u prezidenty padkreśliŭ, što ciapier Biełaruś uciahnutaja ŭ «vajenny kanflikt z brackim narodam».
«Ludziej ciapier chvaluje vajna va Ukrainie i toje, što ŭłada Biełarusi addała našu terytoryju dla vajskovaha ŭdaru pa Ukrainie ŭzbrojenym siłam RF. My zaŭsiody byli niejtralnaj dziaržavaj i hanarylisia hetym, a ciapier dla mižnarodnaj supolnaści i Ukrainy asabista stali krainaj-pamahatym ahresara.
Nie daj boh, ułada vyrašycca adpravić u zonu vajskovaha kanfliktu našych sałdat. Biełaruski narod hetaha Łukašenku nikoli nie daruje. Tak, ja razumieju, što vajna idzie z 2014 hoda, ale paśla pryznańnia ŁNR i DNR adpraŭka miratvorčaha kantynhientu Rasijskaj Fiederacyi na terytoryju hetych rehijonaŭ była b značna bolš łahičnaja, čym pačatak vajny Rasii i Ukrainy. Toje, što adbyvajecca ciapier, — šok i bol dla ŭsich», — napisaŭ jon.
Hajdukievič: Niejki idyjot paraiŭ pierachodzić na biełaruskuju movu. Ale ruskaja zaŭsiody budzie rodnaj
«Pryčym tut prablemy miru?» Deputat aryhinalna patłumačyŭ prysutnaść rasijskich vojskaŭ u Biełarusi
23‑hadovy repier z Astraŭca zahinuŭ za Rasiju na vajnie. Pavajavaŭ jon, vidać, kala miesiaca17
23‑hadovy repier z Astraŭca zahinuŭ za Rasiju na vajnie. Pavajavaŭ jon, vidać, kala miesiaca
«Uśviedamlaju, što mahu stać pieršaj biełaruskaj, jakaja naviedaje ŭsie krainy śvietu». Padarožnica ź Minska razmaŭlaje na 8 movach i maryć pražyć 200 hadoŭ88
Kamientary