Lidar niezaležnych prafsajuzaŭ na sustrečy z MVF raskrytykavaŭ sankcyi
Staršynia Biełaruskaj kanfiederacyi prafsajuzaŭ Alaksandr Jarašuk anłajn sustreŭsia z misijaj Mižnarodnaha valutnaha fonda pa Biełarusi. Jon raskazaŭ čalcam misii pra palityčnuju i sacyjalna-ekanamičnuju situacyju ŭ krainie, a taksama pra svaje prahnozy jaje raźvićcia. Pa słovach Jarašuka, staŭleńnie niezaležnych prafsajuzaŭ da sankcyj nieadnaznačnaje, bo «jany supiarečać metam, dasiahnieńnie jakich lažyć u asnovie stvareńnia i dziejnaści prafsajuzaŭ», havorycca na sajcie kanfiederacyi.
Pry adkazie na pytańnie pra ekanamičnyja sankcyi, jakija ŭvodziacca ES i ZŠA suprać biełaruskich uładaŭ, Alaksandr Jarašuk adznačyŭ, što nie ličyć ich upłyŭ krytyčnym.
«Pa dvuch pryčynach. Adna zaklučajecca ŭ tym, što zastajucca ščyliny, kab syści z-pad ich, što i paćviardžajecca siońnia kankretnymi prykładami, — havorycca ŭ paviedamleńni kanfiederacyi. — Druhaja źviazanaja z padtrymkaj Rasii, jakaja zacikaŭlenaja ŭ minimizacyi Biełaruśsiu strat ad sankcyj i budzie hetamu ŭsialak sadziejničać».
Alaksandr Jarašuk adznačyŭ nieadnaznačnaje staŭleńnie niezaležnych prafsajuzaŭ da ekanamičnych sankcyj, «pakolki jany supiarečać metam, dasiahnieńnie jakich pakładzienaje ŭ asnovu stvareńnia i dziejnaści prafsajuzaŭ».
«Hetyja mety — zaniataść, zachavańnie pracoŭnych miescaŭ i stvareńnie novych, zabieśpiačeńnie hodnych zarobkaŭ. Sankcyi niasuć pahrozu dasiahnieńniu hetych met. A sam pa sabie sankcyjny cisk, jak pakazała historyja, nie zabiaśpiečvaje padzieńnie aŭtarytarnych i dyktatarskich palityčnych režymaŭ», — paviedamlaje kanfiederacyja.
Miž tym Jarašuk adznačyŭ, što havorka nie idzie ab chutkim kałapsie biełaruskaj ekanomiki.
«Dziakujučy ŭdałaj kanjunktury ŭ biahučym hodzie, zabiaśpiečany rost pramysłovaj vytvorčaści i asabliva ekspartu, rost zarabotnych płat, — havorycca ŭ paviedamleńni. — Rost koštaŭ na kalijnyja ŭhnajeńni i naftapradukty, rasijskija subsidyi na enierhanośbity dazvalajuć prahnazavać adnosna narmalnaje prachodžańnie 2022 hoda ŭ sacyjalna-ekanamičnaj śfiery».
Ale pry hetym, adkazvajučy na pytańnie MVF pra ŭradavyja prahramy ekanamičnaha raźvićcia, Jarašuk adznačyŭ, što niama nahody dla doŭhaterminovych aptymistyčnych prahnozaŭ.
«Da hetych prahram niemahčyma stavicca surjozna, pakolki jany raspracoŭvajucca tymi, chto vyrašaje imhniennuju zadaču vyžyvańnia pa pryncypie «dzień prastajać dy noč pratrymacca». U ciapierašniaha kirujučaha palityčnaha režymu niama i nie moža być nijakaj ekanamičnaj stratehii», — adznačajecca na sajcie kanfiederacyi.
Ciapier čytajuć
DFR kašmaryć transpartnikaŭ: u vialikich łahistyčnych apierataraŭ kryminalnyja spravy, vobšuki i aryšty6
DFR kašmaryć transpartnikaŭ: u vialikich łahistyčnych apierataraŭ kryminalnyja spravy, vobšuki i aryšty
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»1111
Kamientary