Film tydnia: «Minułaj nočču ŭ Socha». Čamu jaho varta pahladzieć

«Minułaj nočču ŭ Socha» raspaviadaje nam historyju maładoj žančyny Elli, što vučycca ŭ Łondanie na dyzajnierku adzieńnia. Niezrazumiełym čynam Elli pieranosicca ŭ Łondan 1966 hoda, dzie traplaje ŭ cieła Sendzi — viadomaj śpiavački tahačasnaha načnoha Łondana. Spačatku atmaśfiera 60-ch začaroŭvaje dziaŭčynu. Ale ź ciaham času Elli razumieje, što žyćcio Sendzi našmat bolš tajamničaje i niebiaśpiečnaje, čym joj zdarałasia adrazu.

Nazva filma adsyłaje da znakamitaha łondanskaha rajona Socha, centra tusovačnaha žyćcia brytanskaj stalicy, i mienavita ŭ Socha adbyvajucca asnoŭnyja padziei karciny. Režysior Edhar Rajt pryznajecca — u dziacinstvie jon šmat słuchaŭ historyi ŭłasnych baćkoŭ pra staleńnie ŭ Brytanii 1960-ch, pra atmaśfieru tych hadoŭ. Ale pry hetym Rajt zaŭvažaŭ, što ŭspaminy jaho maci pra toj čas byli bolš zmročnyja, čym u baćki. U svaich raskazach jana namiakała, što Socha 1960-ch nie zaŭsiody byŭ biaśpiečnym miescam dla žančyn.

Paźniej Rajt pierajechaŭ u Łondan, i horad začaravaŭ jaho samoha. U brytanskaj stalicy režysior žyŭ i pracavaŭ na praciahu kala 27 hadoŭ, i, jak sam kaža, pravioŭ bolš za ŭsio času mienavita ŭ Socha. Nie dziva, što jaho klikała ideja pryśviacić Łondanu i Socha film. Pryčym klikała daŭno — ideja «Minułaj nočču ŭ Socha» pryjšła da jaho bolš za dziesiać hadoŭ tamu.

Atmaśfiera minułych časoŭ

Pryznańnie ŭ kachańni da Łondana atrymałasia zmročnym, ale duža pryhožym. Svoj układ u heta zrabiła viadomaja brytanskaja dyzajnierka kaściumaŭ Adyl Dyks-Mirjo, što pracavała nad filmam. Vy, napeŭna, pamiatajecie sieryjał «Čarnobyl» 2019 hoda ad kampanii HBO i toje, jak tonka tam pieradali atmaśfieru kanca savieckaj epochi. Dyk voś — heta, jak i inšyja zorkavyja filmy nakštałt «Vialikich spadziavańniaŭ» i «Miłaha siabra», praca spadaryni Dyks-Mirjo.

Raniej dyzajnierka ŭžo pracavała nad filmami ŭ stylistycy 1950-ch i 60-ch, ale svaju apošniuju karcinu jana vydzialaje siarod inšych. Dyks-Mirjo nazyvaje «Minułaj nočču ŭ Socha» vielmi cikavym vyklikam dla siabie. Siarod kaściumaŭ, stvoranych joj dla karciny, vydzialajecca sukienka, całkam zroblenaja z haziety. Taki ŭbor zrabiła dla siabie hałoŭnaja hierainia — Elli, jakuju natchniała, pa mierkavańniu Dyks-Mirjo, zorka 1950-ch i 60-ch Odry Chiopbiern. Jašče adzin vyklik dla dyzajnierki — stvareńnie kaściumaŭ dla cełaha modnaha pakaza, u jakim udzielničaje Elli.

Atmaśfieru 1960-ch dapamahajuć stvarać tahačasnyja chity, pryčym adzin ź ich pasłužyŭ krynicaj nazvy dla karciny. Heta trek Last night in Soho ad vykanaŭcaŭ Dave Dee, Dozy, Beaky, Mick & Tich. Raspaviadajuć, što režysior karciny Edhar Rajt i jaho siabra Kviencin Tarancina niejak uzhadvali hetuju pieśniu ŭ adnoj z hutarak - pa mierkavańniu Tarancina, Last night in Soho staŭ by lepšaj hałoŭnaj pieśniaj dla filma, što nikoli nie byŭ zrobleny.

Ale nie Tarancina adzinym. Siarod jarkich trekaŭ novaha filma ŭzhadvajuć Beat Girl ad Džona Barry, stvaralnika muzyki dla lepšych filmaŭ franšyzy pra Džejmsa Bonda, dy i aŭtara ŭłasna hałoŭnaj muzykalnaj temy franšyzy. Jość tam i znakamitaści nakštałt Devida Boŭi i Rolling Stones, jość i mienš viadomyja imiony i treki naŭprost z 1960-ch.

Hałoŭnaja zorka siarod akcioraŭ chorara — Ania Tejłar-Džoj, 25-hadovaja brytanka, što pieraŭvasobiłasia ŭ pryhažuniu Sendzi. Biełaruskija hledačy mohuć viedać jaje pa sieryjału «Chod karalevy» ad siervisa Netflix, dzie Tejłar-Džoj syhrała vymyšlennuju šachmatystku-vunderkinda Biet Charman. Paśla zapuska sieryjał uźlacieŭ na pieršaje miesca siarod papularnych prajektaŭ siervisa, i, kažuć, navat spryjaŭ rostu papularnaści hulni ŭ šachmaty.

Rejtynhi «Minułaj nočču ŭ Socha» na mižnarodnych resursach:

IMDB - 7,5/10

Rotten Tomatoes - 75%

U minskich kinateatrach nie buduć pakazvać «Spakusu» Poła Vierchoviena

Bieniedykt Kambierbetč syhraje Alaksandra Litvinienku ŭ sieryjale HBO

• 0
• 0
• 0
• 0
• 0
• 0
• 0
• 0