Dva palitviaźni źjechali za miažu. Ich paručycielam prysudzili štrafy.
Kiraŭnika «Ofisa pa pravach ludziej ź invalidnaściu» Siarhieja Drazdoŭskaha i jurysta arhanizacyi Aleha Hrableŭskaha zatrymali 3 lutaha. Hrableŭski znachodziŭsia ŭ SIZA, a Drazdoŭski — pad chatnim aryštam. Ich adpuścili 31 lipienia pad paručalnictva čatyroch čałaviek. Učora sud Partyzanskaha rajona Minska pryniaŭ rašeńnie spahnać z paručalnikaŭ hrošy.
Zhodna z artykułam 121 Kryminalna-pracesualnaha Kodeksa RB, asabistaje paručycielstva zaklučajecca ŭ pryniaćci na siabie asobami piśmovaha abaviazacielstva ab tym, što padazronyja abo abvinavačanyja, znachodziačysia na voli, nie schavajucca ad orhana kryminalnaha pieraśledu i suda, nie buduć pieraškadžać rasśledavańniu spravy abo razhladu jaje sudom i nie buduć zajmacca złačynnaj dziejnaściu.
Miž tym i Siarhiej Drazdoŭski, i Aleh Hrableŭski źjechali za miažu. Takim čynam, jany parušyli artykuł 121.
«Viasna» paviedamlaje, što ŭsich čatyroch paručalnikaŭ asudzili. Sudździa Partyzanskaha rajona Michaił Makarevič vyrašyŭ spahnać ź ich hrošy.
U dačynieńni da dvuch paručycielaŭ Siarhieja Drazdoŭskaha — pa 100 bazavych vieličyń (2900 biełaruskich rubloŭ), a ŭ dačynieńni da dvuch paručycielaŭ Aleha Hrableŭskaha — 200 bazavych vieličyń (5800 biełaruskich rubloŭ) i 250 bazavych vieličyń (7250 biełaruskich rubloŭ). Hetaje rašeńnie moža być abskardžana ciaham 10 dzion.
Kamientary