Viasielnaha fatohrafa asudzili da troch hadoŭ kałonii za niekalki kamientaroŭ
12 kastryčnika sud Centralnaha rajona Minska vynies prysud 46-hadovamu viasielnamu fatohrafu Dźmitryju Sončyku. Sudździa Dźmitryj Karsiuk pryznaŭ jaho vinavatym pavodle art. 364 i art. 369 i asudziŭ da troch hadoŭ kałonii pa sukupnaści pakarańniaŭ šlacham pahłynańnia mienš strohaha termina bolš strohim: dva hady «chatniaj chimii» pavodle art. 369 KK i try hady pazbaŭleńnia voli ŭ kałonii pavodle art. 364 KK.
Taksama Sončyk musić vypłacić dvum paciarpiełym pa try tysiačy rubloŭ maralnaj škody, 174 rubli dziaržpošliny, jak paviedamlajuć pravaabaroncy.
Bok dziaržabvinavačańnia padtrymaŭ prakuror Arciom Ćviatkoŭ. Sončyk admoviŭsia ad abarony.
Sončyk byŭ zatrymany 28 červienia 2021 hoda, z taho momantu znachodziŭsia pad vartaj.
Pavodle abvinavačańnia, jon abraziŭ čatyroch čałaviek i vykazaŭ pahrozu žyćciu ŭ kamientarach u adnym z telehram-kanałaŭ ciaham 2020-2021 hadoŭ. Paciarpiełyja — A. Pierachodźka ź Ivacevickaha RAUS, načalnik Niaśvižskaha RAUS A. Hrynkievič, staršy lejtenant Niaśvižskaha RAUS R. Pranievič i supracoŭnik HUBAZiKa A. Aloksa — jany nie źjavilisia na pasiadžeńnie.
Pahrozy vyklikali ŭ paciarpiełych strach za žyćcio i zdaroŭje i paŭpłyvali na ich psichičny stan: jany ŭsprymali pahrozy jak realnyja. Pierachodźka i Pranievič padali pazoŭ na zadavalnieńnie maralnaj škody ŭ pamiery 3000 rubloŭ kožnamu.
Sončyk całkam pryznaŭ vinu i admoviŭsia ad dačy pakazańniaŭ na pasiadžeńni.
Na sudzie začytali jahonyja pakazańni padčas papiaredniaha śledstva. Tady jon tłumačyŭ, što pisaŭ kamientary praz emocyi, paśla prahladu videa źbićcia i zatrymańniaŭ, aburany niepravamiernymi dziejańniami supracoŭnikaŭ. Ale padkreśliŭ, što nie źbiraŭsia ažyćciaŭlać pahrozy.
Ahałošvańnie materyjałaŭ spravy prachodziła ŭ zakrytym režymie praz toje, što supołki, dzie jany raspaŭsiudžvalisia, pryznanyja ekstremisckimi.
Padčas sprečak Arciom Ćviatkoŭ zaprasiŭ dla Sončyka try hady pazbaŭleńnia voli ŭ kałonii ahulnaha režymu pa sukupnaści pakarańniaŭ šlacham pahłynańnia mienš strohaha termina bolš strohim.
U apošnim słovie adzinaje, što skazaŭ Sončyk, — pavinšavaŭ siastru i maci, jakija znachodzilisia ŭ sudovaj zale, z nadychodziačym Dniom maci. Uvieś čas jon znachodziŭsia za kratami ŭ kajdankach.
Za hod — 22 spravy. Što viadoma pra maładoha prakurora Ćviatkova, jaki robić karjeru na palityčnych sudach
Ciapier čytajuć
Što viadoma pra biełarusa, jaki zahinuŭ la Elbrusa8
Što viadoma pra biełarusa, jaki zahinuŭ la Elbrusa
Hrodzienskaha padletka adpravili ŭ škołu ŭ Litvu — jon vyvučyŭ litoŭskuju i ciapier pierakładaje ŭ Jeŭraparłamiencie. Pierakładaŭ jon i Cichanoŭskich3030
Kamientary