Jahoru Marcinoviču i Andreju Skurko praciahnuli termin utrymańnia pad vartaj jašče na miesiac
Našaniŭcy ŭžo dva miesiacy adbyli ŭ SIZA, ich nie vyzvalili. Za hety čas Śledčy kamitet nie zmoh skončyć rasśledavańnie, tamu miera ŭtrymańnia praciahnutaja jašče na miesiac.
Pieršy raz miera ŭtrymańnia pad vartaj była abranaja 18 lipienia adrazu na maksimalny termin — dva miesiacy. Adnak 18 vieraśnia na svabodu Marcinovič i Skurko nie vyjšli. Svajakam nie paviedamlali ab padaŭžeńni miery ŭtrymańnia, adnak, sychodziačy z normaŭ Kryminalna-pracesualnaha kodeksa, vynikaje, što vartu praciahnuli jašče na miesiac. Heta dazvalajecca, kali śledstva nie skončyła pracu za adviedzieny raniej termin.
Pa słovach našaniŭcaŭ, nijakija śledčyja dziejańni ź imi za hety čas nie adbyvalisia, jany prosta praciahvajuć utrymlivacca ŭ izalacyi.
Nahadajem, Jahora Marcinoviča i Andreja Skurko abvinavačvajuć pa č.2 art. 216 KK («naniasieńnie majomasnaj škody biez prykmietaŭ raskradańnia hrupaj asobaŭ»). Pretenzija zaklučajecca ŭ tym, što apłata za kamunalnyja pasłuhi pamiaškańnia była pa taryfach dla fizasobaŭ, a treba było płacić pa taryfach dla jurasobaŭ.
Śledčyja naličyli, što za čatyry hady (z 2017 pa maj 2021) pradpryjemstvu «Minenierha» byŭ naniesieny ŭron — 3,5 tysiačy rubloŭ. Samo pradpryjemstva z pretenzijami nikoli nie źviartałasia.
Marcinovič i Skurko pryznanyja palitviaźniami. Pa art. 216 KK maksimalna mahčymy termin utrymańnia pad vartaj da suda — šeść miesiacaŭ.
Kali łaska, padtrymajcie našaniŭcaŭ listom, telehramaj ci hrašovym pieravodam. Va ŭmovach izalacyi heta dapamahaje trymacca.
Adras: 220030, h. Minsk, vuł. Vaładarskaha, 2. SIZA №1
Marcinoviču Jahoru Alaksandraviču
Skurko Andreju Hienadzijeviču
Kamientary