Łukašenka anansavaŭ źjaŭleńnie ŭ Biełarusi «dziasiatkaŭ samalotaŭ i viertalotaŭ» z Rasii — ale ŭ nas niama stolki piłotaŭ. Ruskija zastanucca?
Na pačatku vieraśnia Łukašenka skazaŭ, što najbližejšym časam z Rasii prybuduć dziasiatki samalotaŭ i viertalotaŭ — «nie budu kazać, za jakija hrošy i što». Biełaruskija lotčyki ŭ kamientaryi «Našaj Nivie» zaŭvažajuć, što ŭ nas nie budzie stolki hatovych śpiecyjalistaŭ dla piłatavańnia ažno «dziasiatkaŭ» samalotaŭ i viertalotaŭ.
Ale vajenny ekśpiert Alaksandr Alesin, jakomu my zadali hetaje pytańnie, ličyć, što heta tolki «mastackaje prycharošvańnie» i ŭ realnaści čakać dziasiatkaŭ avijacyjnych adzinak nie vypadaje.
«U nas jość kantrakt z rasijanami na pastaŭku dvanaccaci Su-30SM, ź jakich čatyry my ŭžo atrymali, u 2022-m płanujucca da atrymańnia jašče čatyry, i jašče čatyry — nie vyznačana kali. Ja dumaju, što tut havorka mienavita pra hetyja samaloty, płany byli abvieščany daŭno. Pry hetym, zakupka adbyvajecca ŭ kredyt — ahulnaja cana kala za ŭsio kala 600 miljonaŭ dalaraŭ, jakija pryjdziecca addavać», — ličyć Alesin.
«Taksama ŭ nas budzie padpisany kantrakt na čatyry ŭdarnyja viertaloty Mi-35m, ja tak razumieju, kantrakt na finalnaj stupieni», — skazaŭ Alesin.
Analityk Jahor Lebiadok taksama ličyć, što havorka pra «dziasiatki» naŭrad ci imaviernaja. Ale zaŭvažaje, što ŭ Biełarusi budzie dziejničać sumiesny vajenny padrychtoŭčy centr, kudy taksama mohuć być pastaŭleny samaloty.
«Sapraŭdy, niejkija samaloty mohuć prybyć dla navučańnia ŭ sumiesnym centry ŭ Baranavičy, heta budzie jak by sumiesnaja majomaść bakoŭ, abo ŭ lizinhu. Ale treba razumieć, što trenirovačnyja samaloty chutka vykarystoŭvajuć svoj abmiežavany resurs, kali paloty adbyvajucca niekalki razoŭ na dzień, ich chutka «źlatajuć». Rasijanie abaviazvalisia pastavić niekalki takich samalotaŭ, heta asobnaja pastaŭka», — kaža Alesin.
Takim čynam, ekśpierty sychodziacca na dumcy, pakul što zajavy Łukašenki treba aceńvać u ramkach staroj, najaŭnaj infarmacyi ab pastaŭkach.
Kamientary