«Biełaruśnaftu» vyvieli z «Biełnaftachima», kab paźbiehnuć sankcyj. I što, dapamoža?
Kancern «Biełnaftachim», u jaki ŭvachodzić šerah pradpryjemstvaŭ, siarod jakich da niadaŭniaha času była i «Biełaruśnafta», trapiŭ pad sankcyi ES i ZŠA. 17 lipienia Ukazam Łukašenki «Biełarusnafta» była vyviedziena z padparadkavańnia kancernu.
Aproč taho, što «Biełarusnafta» kantraluje da dvuch tracin AZS u Biełarusi, u kampanii jość adna vialikaja sprava ź Jeŭropaj — «Biełarusnafta» ekspartuje 1,6 miljon ton biełaruskaj nafty, jakuju zdabyvajuć u Homielskaj vobłaści, na NPZ «Rasnafty» ŭ Hiermanii.
Takim čynam, fintom z vyvadam z šerahaŭ kancernu, režym spadziajecca, što pastaŭki ŭ Hiermaniju i raźliki pa ich praciahnucca. Ale ci dapamoža? My spytalisia pra heta ŭ dvuch bankiraŭ, jakija prakamientavali situacyju.
«Kancern «Biełnaftachim» — heta ŭsiaho tolki kirujučaja kampanija, a «Biełarusnafta» heta asnobny RUP, sa svajoj majomaściu i kiraŭnictvam. Tamu, pa farmalnaj prykmiecie, paśla hetaha finta «Biełarusnafta» pad sankcyjami nie budzie», — skazała «Našaj Nivie» abaznanaja krynica.
Druhi ekśpiert dadaje, što chacia farmalna «Biełarusnafta» i vyjdzie z-pad sankcyj, vyrašeńnie prablemy šmatpaviarchovaje.
«Usio budzie zaležać ad čałavieka, jaki afarmlaje płaciož. Naprykład, u Deutsche Bank siadzić umoŭny apieratar Hans, bačyć dziŭnavatuju dziaržaŭnuju kampaniju, na jakuju treba pieravieści hrošy. Hans učora čytaŭ u haziecie, što ź Biełaruśsiu niešta niezrazumiełaje robicca, u jaho naradžajucca sumnievy.
Pry hetym, dla «Biełarusnafty» cana pytańnia — heta suma pieravoda, a dla Hansa i, šyrej, dla Deutsche Bank — heta kamisija z sumy. Heta drobiaź, hruba kažučy, dla niamieckaha banka.
Ale kali jon dapuścić «zabaronienuju» tranzakcyju, to banku heta moža kaštavać niesuvymierna bolš, čym jon zarobić na kamisii.
Tamu Hans, chutčej za ŭsio, atrymaje instrukcyju, i sam budzie tak dumać, što jamu praściej prosta hetuju płaciožku adfutbolić, čym hublać čas i raźbiracca, pad sankcyjami jany tam užo, ci nie pad sankcyjami.
Praŭda, u hety momant u historyi pavinien źjavicca finansavy dyrektar «Biełarusnafty», jaki pakaža jamu papiery, što pa farmalnaj prykmiecie ŭmoŭny Deutsche Bank užo moža pieravodzić hrošy. I voś jak vyrašycca hetaja situacyja: Hans prosta kładzie trubku abo kaža «Dašlicie mnie papiery, ja padumaju», budzie zaležać ad banka i ad vykanaŭcy», — kaža bankir.
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary