U Homieli vynieśli prysud niepaŭnaletniamu palitviaźniu Mikitu Załatarovu za napad na supracoŭnika SIZA
Sud pryznačyŭ jamu pakarańnie ŭ vyhladzie paŭtary hadoŭ pazbaŭleńnia voli, što ŭ sukupnaści z terminam, da jakoha Mikita byŭ prysudžany pa spravie ab masavych biesparadkach i «kaktejlach Mołatava», składzie 4 hady 6 miesiacaŭ z adbyvańniem u vychavaŭčaj kałonii, paviedamlajuć «Mocnyja naviny».
U lutym, nahadajem, 17-hadovaha padletka asudzili pa spravie ab «kaktejlach Mołatava» i prysudzili da 5 hadoŭ vychavaŭčaj kałonii.
U hety raz Mikitu Załatarovu vyłučyli abvinavačvańnie pa artykule 364 KK RB «Hvałt albo pahroza prymianieńnia hvałtu ŭ dačynieńni da supracoŭnika orhanaŭ unutranych spraŭ».
Sankcyja hetaha artykuła praduhledžvaje da šaści hadoŭ pazbaŭleńnia voli.
Sud nad padletkam pačaŭsia 7 lipienia. Mikita Załataroŭ vinu pryznaŭ, ale dadaŭ, što abraźlivyja słovy pramoviŭ na emocyjach. Siońnia ŭ sudzie prajšli sprečki bakoŭ.
Dziaržabvinavaŭca zajaviŭ, što vina Mikity Załatarova całkam dakazanaja, i zapytaŭ dla jaho 2 hady pazbaŭleńnia voli.
Advakat Siarhiej Krasnoŭ, jaki abaraniaje Mikitu ŭžo ŭ druhi raz, adznačyŭ, što pieryjad praciahłaha znachodžańnia niepaŭnaletniaha Załatarova pad vartaj, jaho stan zdaroŭja, niesumnienna, nakłali adbitak na psichaemacyjny stan padletka.
Advakat chadajničaŭ ab pryznačeńni svajmu padabaronnamu minimalnaha pakarańnia, mierkavanaha pa hetym artykule, a taksama ab pamianšeńni pamieru kampiensacyi maralnaj škody, zapatrabavanaha paciarpiełymi.
U apošnim słovie Mikita Załataroŭ skazaŭ: «Prašu stroha mianie nie karać. Chaču paprasić prabačeńnia pierad paciarpiełymi: ja prosta nie spraviŭsia z emocyjami. Prašu sud pakinuć mnie toj termin, jaki ŭ mianie ŭžo jość».
Sud pastanaviŭ pryznać Mikitu vinavatym u ździajśnieńni złačynstva pa artykule 364 KK RB i pryznačyć jamu pakarańnie ŭ vyhladzie 1,5 hoda pazbaŭleńnia voli, što ŭ sukupnaści z terminam, da jakoha Mikita byŭ prysudžany raniej składzie 4 hady 6 miesiacaŭ z adbyvańniem u vychavaŭčaj kałonii.
Kampiensacyju maralnaj škody ŭ 1000 rubloŭ, jakuju zapatrabavali abodva paciarpiełyja, sud vyrašyŭ pamienšyć da 500 rubloŭ kožnamu.
U Estonii aryštavany Aleh Maisiejeŭ, kažuć jaho znajomyja. Heta były kiroŭca Cichanoŭskaj, jaki z časam staŭ jaje zaciatym krytykam23
Kamientary