103 hady tamu była abvieščana Biełaruskaja Narodnaja Respublika
9 sakavika 1918 hoda ŭ Miensku była pryniata Druhaja Ustaŭnaja hramata, što abviaščała BNR. A praz dva tydni, 25 sakavika, była abvieščana niezaležnaść Biełaruskaj Narodnaj Respubliki.
103 hady tamu, 9 sakavika 1918 hoda, u akupavanym kajzieraŭskimi vojskami Miensku była abvieščana Druhaja Ustaŭnaja hramata.
Za tydzień da hetaha pamiž niemcami i balšavikami byŭ zaklučany Brescki mir. Za niemcami zastavałasia paŭnočna-zachodniaja častka Biełarusi, a balšaviki musili atrymać centralnuju i ŭschodniuju Biełaruś. Aproč taho, niemcy paabiacali balšavikam nie pryznavać nijakich dziaržaŭ na akupavanych terytoryjach, jakija paśla 3 sakavika 1918 h. abviaścili pra svaju niezaležnaść. Narodny Sakrataryjat i Vykanaŭčy kamitet Rady Usiebiełaruskaha źjezda niamieckija ŭłady, što siadzieli ŭ Minsku, taksama nie pryznavali.
U takich umovach biełaruskija palityki vyrašyli abviaścić Druhuju Ustaŭnuju Hramatu. Pieršaja hramata była apublikavana 21 lutaha.
Tekst Druhoj hramaty składaŭsia z vaśmi punktaŭ. U miežach raśsialeńnia biełaruskaha naroda simvalična abviaščałasia Biełaruskaja Narodnaja Respublika. Časova zakanadaŭčuju ŭładu ŭ BNR brała na siabie Rada I Usiebiełaruskaha Źjezda.
Abviaščalisia pravy i volnaści hramadzianaŭ i narodaŭ Biełarusi: svaboda słova‚ druku‚ schodaŭ. Była skasavanaja pryvatnaja ŭłasnaść na ziamlu, ustanoŭlena praciahłaść rabočaha dnia 8 hadzin, abviaščałasia roŭnaść usich moŭ i prava ŭsich narodaŭ na aŭtanomiju.
18 sakavika Rada Usiebiełaruskaha źjezda była pierajmienavanaja ŭ Radu BNR, 23 sakavika ŭ jaje skład była ŭklučana Vilenskaja Biełaruskaja Rada, a ranicaj 25 sakavika była pryniata Treciaja Ustaŭnaja hramata, jakaja simvalična abviaščała niezaležnaść BNR.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2020
Kamientary