U niadzielu ŭ lesie kala Salihorska zatrymali niekalki čałaviek. Čaćviora — u IČU da suda
U niadzielu, 28 lutaha, u pasiołku pobač z Salihorskam zatrymali niekalki čałaviek. Troje ź ich — strajkamaŭcy «Biełaruśkalija». Jašče piać — žančyny. Ci byli inšyja zatrymanyja, pakul što dakładna nieviadoma. Niekatorych da suda ź izalatara adpuścili dadomu: heta žančyny, u jakich jość niepaŭnaletnija dzieci, i piensijanierka, piša Tut.by.
28 lutaha ŭ lesaparkavaj zonie kala pasiołka Tyčyny Salihorskaha rajona jany sustrelisia ź siabrami i adnadumcami, hutaryli, fatahrafavalisia. Heta było kala 16-j hadziny dnia, prykładna praz paŭhadziny pryjechaŭ AMAP.
— Čujem: «Stajać — pracuje AMAP». I pačali nas zatrymlivać. U vyniku piaciarych žančyn pahruzili ŭ adzin bus, niekalki chłopcaŭ — u inšy. Nas pryvieźli ŭ IČU i pakinuli ŭ prahułačnym dvoryku. Pastupova adtul klikali na dopyt: adrazu byŭ vopis rečaŭ, potym pytalisia, u kaho jość dzieci i chto dzie žyvie.
Pa słovach zatrymanaj, tym časam u niekatorych doma pravodzili ahlad. U kolkich dakładna — nieviadoma. U adnoj kanfiskavali čyrvonuju stužku, jakoj byŭ źviazany bukiet — jaho dziaŭčyna daryła mamie na dzień naradžeńnia.
— Zatym nas pieraviali ŭ kamiery i ŭžo z kamier vyklikali i składali pratakoły pavodle art 23.4 KaAP (Niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni im słužbovych paŭnamoctvaŭ) i 23.34 KaAP (Parušeńnie paradku arhanizacyi abo praviadzieńnia masavych mierapryjemstvaŭ). U IČU my prabyli prykładna da paŭnočy, zatym pad raśpisku nas adpuścili da suda dadomu. Ź piaci žančyn adpuścili čatyroch: tych, u kaho jość niepaŭnaletnija dzieci, i piensijanierku. Piensijaniercy było drenna. Adnu dziaŭčynu pakinuli da suda ŭ izalatary.
Viadoma, što troje zatrymanych u lesaparku chłopcaŭ — u IČU ŭ Salihorsku da suda. Usie troje — stačkamaŭcy «Biełaruśkalija». Heta Anton Dziamkoŭ, Kanstancin Dziaciejeŭ, Andrej Mahilaviec.
Žurnalisty pahavaryli z žonkami zatrymanych siabraŭ stačkama Antona Dziamkova i Andreja Mahilaŭca. Pa ich słovach, mužy da hetaha času ŭ IČU, kali budzie sud — žančyny dakładna nie viedajuć. Pa jakich mienavita artykułach na ich mužoŭ skłali pratakoły, im taksama dakładna nieviadoma. Kaciaryna, žonka Antona Dziamkova, učora jaho šukała sama:
— Ja jamu telefanavała, jon byŭ niedastupny, u hadzinu nočy pračytała, što jon u milicyi.
Natalla, žonka Andreja Mahilaŭca, učora muža taksama šukała sama: telefanavała ŭ miascovaje RAUS. Prykładna a 22-j hadzinie viečara joj paćvierdzili, što muž zatrymany.
Datelefanavacca va UUS Minskaha abłvykankama, kab atrymać apieratyŭny kamientar pa situacyi, nie ŭdałosia.
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary