Brusiel: List Łukašenku z tytułam «prezident» nie aznačaje, što jon lehitymny kiraŭnik dziaržavy
Presavy pradstaŭnik źniešniepalityčnaj słužby EZ Peter Stana patłumačyŭ «Svabodzie», što niadaŭni list ad Eŭrakamisii i SAAZ Alaksandru Łukašenku, u jakim jon nazyvajecca prezydentam, nie aznačaje, što Brusel ličyć jaho lehitymnym kiraŭnikom dziaržavy.
«List byŭ nakiravany Alaksandru Łukašenku ŭ jakaści budučaha staršyni Sadružnaści Niezaležnych Dziaržaŭ z zaprašeńniem Biełarusi ŭ ACT (Inicyjatyvu paskareńnia dostupu da srodkaŭ dla baraćby z COVID-19. — RS) u hetaj jakaści», — skazaŭ «Svabodzie» Peter Stana.
«SAAZ, jakaja lideravała ŭ rassyłcy sumiesnych zaprašeńniaŭ, vyrašyła vykarystać u aficyjnym paštovym adrasie tytuł prezydenta respubliki. Heta nijakim čynam nie aznačaje źmieny ŭstalavanaj pazycyi EZ, jaki ličyć, što Łukašenka nia maje demakratyčnaj lehitymnaści», — dadaŭ jon.
Peter Stana taksama adznačyŭ, što SAAZ pryznała pamyłku ŭ vykarystańni ŭ liście podpisu kiraŭnicy Eŭrakamisii Ursuli fon der Lajen. Pavodle Stana, list mieŭsia być padpisany kamisarkaj Eŭrakamisii Stelaj Kiryjakides.
Napiaredadni pres-słužba Alaksandra Łukašenki apublikavała ŭ telehram-kanale «Puł Pieršaha» kopiju lista ad kiraŭnicy Eŭrakamisii Ursuli fon der Lajen i kiraŭnika Suśvietnaj arhanizacyi achovy zdaroŭja Tedrasa Hiebrejesusa, dzie da jaho źviartajucca jak da «prezydenta» Biełarusi.
«Pišuć adno, a na Zachadzie vitajuć inšych. Mahli napisać eks-prezydentu, byłomu prezydentu ci biełaruskamu narodu. Tym nia mienš ja ŭdziačny, što jany razumiejuć, chto ŭ domie haspadar», — prakamentavaŭ hety list Łukašenka padčas Usiebiełaruskaha narodnaha schodu.
Kamientary