«Amapaviec admoviŭsia ad pakazańniaŭ». 76-hadovy vydaviec Barys Pastarnak raspavioŭ pra zatrymańnie
Udzień 15 listapada siarod socień zatrymanych byŭ i 76-hadovy Barys Pastarnak, viadomy vydaviec. Jaho vydaviectva «Vriemia» publikuje knihi Śviatłany Aleksijevič, Viktara Marcinoviča i inšych viadomych piśmieńnikaŭ.
Pastarnak raspavioŭ «Našaj Nivie» pra svajo zatrymańnie i vyzvaleńnie.
«Usio adbyłosia kala 14-j hadziny, kali pačaŭsia chapun la mietro «Puškinskaja».
Ja vyjšaŭ z padziemnaha pierachoda i padyšoŭ da miemaryjała Tarajkoŭskaha. I tut z boku kinateatra «Aŭrora» spuścilisia čorna-zialonyja čałaviečki i pačali chapać prosta vypadkovych ludziej, tych, chto stajaŭ la miemaryjała. Hetych zatrymanych sprabavali adbivać astatnija, u asnoŭnym, pažyłyja žančyny.
A la darohi stajali dva mikraaŭtobusy siłavikoŭ.
Hetyja mikraaŭtobusy, napeŭna, vielmi krochkija, bo chtości pnuŭ toj mikraaŭtobus i ź jaho adrazu ž vysypalisia siłaviki ŭ čornym i pačali taksama zatrymlivać usich, chto trapić pad ruku.
Na mianie, napeŭna, źviarnuli ŭvahu, bo ja stajaŭ sa smartfonam — u vyniku, adzin siłavik šturchnuŭ mianie ŭ śpinu. Ja ledź nie ŭpaŭ, mianie padchapili «čornyja» i zakinuli ŭ mikraaŭtobus. Paśla na mianie kinuli jašče traich čałaviek. Mnie pašancavała, što ja akazaŭsia ŭnizie, bo tych, chto lažaŭ źvierchu, bili dubinkami.
Paśla peŭny čas my niedzie jeździli, i ŭ vyniku nas dastavili ŭ Frunzienskaje RUUS. Mnie adrazu tam skazali: «Na vas kryminalny artykuł za paškodžańnie milicejskaj majomaści! Vas zatrymajuć na troje sutak!» Śledčy, ci chto tam, pačaŭ składać pratakoł, ja napisaŭ, što z pratakołam nie zhodzien. Kažu: u vas ža tam zdymaŭ niejki čałaviek usio na kamieru, dyk vaźmicie prahladzicie zapis, i ŭsio stanie bačna. Bo ja ž nie ŭ tym uzroście i tempieramiencie, kažu, kab bić milicejskija aŭtobusy.
Tut zajšoŭ dziažurny advakat i paviedamiŭ, što adzin z amapaŭcaŭ štości tam zasumniavaŭsia i admoviŭsia ad pakazańniaŭ. Śledčy vyjšaŭ, paśla viarnuŭsia, skazaŭ mnie: «Vy svabodny!» I parvaŭ pratakoł.
Pašancavała».
Ciapier čytajuć
Jak rychtavaŭsia vizit Cichanoŭskaj u Kijeŭ i čamu jon niekalki razoŭ pieranosiŭsia1
Kamientary