Biełaruski pasoł pra intervju niderłandskamu telekanału: Maje adkazy byli padstaŭleny pad inšyja pytańni

Pasoł Biełarusi ŭ Niderłandach Andrej Jeŭdačenka zajaviŭ, što ŭ intervju, jakoje jon daŭ niderłandskamu telekanału, jaho adkazy «byli daloka nie inšyja pytańni». Jon taksama abvinavaciŭ žurnalista, jaki hutaryŭ ź im, u «anhažavanaści i biezadkaznaści». Siužet z zajavaj Jeŭdačenki byŭ pakazany ŭ efiry «Biełaruś 1», piša TUT.by.

— Zdymka viałasia ŭ našym pasolstvie, jana praciahvałasia kala troch hadzin. Maja pramaja hutarka zaniała prykładna 1 hadzinu 20 chvilin. U adpaviednaści z našaj damoŭlenaściu ŭ viačernim efiry pavinna było vyjści poŭnamaštabnaje 20-chvilinnaje intervju bieź jakich-niebudź ustavak, pierapynkaŭ abo interpretacyj. U vyniku toje, što vyjšła na ekrany, vielmi mocna rasčaravała. Faktyčna mianie vykarystoŭvali jak šyrmu dla ich ułasnaj prahramy. Ja źjaŭlajusia na ekranie tolki try razy, u sumie heta prykładna 30 siekund. Bolš za ŭsio mianie ździviła i aburyła toje, što mnohija rečy byli źmiašanyja, parezanyja, pierabłytanyja. Maje adkazy padstavili pad inšyja pytańni, — skazaŭ Andrej Jeŭdačenka.

U pryvatnaści, jon adznačyŭ, što adkaz «Ja padparadkoŭvajusia voli biełaruskaha naroda» hučaŭ zusim nie na toje pytańnie, jak heta pradstaviŭ kanał.

— Hety adkaz byŭ na pramoje pytańnie: «A vy, spadar ambasadar, źjedziecie z krainy znachodžańnia nazad dadomu, kali hetaha zapatrabuje biełaruski narod?» Ja adkazaŭ, što padparadkoŭvajusia voli biełaruskaha naroda. Vy viedajecie, jakoje pytańnie prystavili da hetaha adkazu.

Jeŭdačenka taksama paviedamiŭ, što napisaŭ list u redakcyju, u jakim źviarnuŭ uvahu «na anhažavanaść i biezadkaznaść» žurnalista.

— Ja kazaŭ pierad intervju, što situacyja ŭ Biełarusi dosyć składanaja i jana nie praduhledžvaje niejkaha sproščanaha analizu abo padychodu, niejkich stereatypnych zajaŭ. Na žal, usio było zroblena z dakładnaściu da naadvarot. Niahledziačy na toje, što miascovaja presa nazyvaje siabie svabodnaj, niezaležnaj i abjektyŭnaj, jakraz abjektyŭnaści ŭ realnaj acency situacyi ŭ mnohich vypadkach i nie chapaje, — zajaviŭ Jeŭdačenka.

Nahadajem, pasoł Biełarusi ŭ Niderłandach Andrej Jeŭdačenka ŭ intervju miascovamu telekanału vykazaŭ svaju pazicyju pa situacyi ŭ Biełarusi. Jon zajaviŭ, što vystupaje za dyjałoh pamiž roznymi palityčnymi siłami ŭ krainie i asudziŭ hvałt z boku siłavikoŭ. Jeŭdačenka taksama adznačyŭ, što Śviatłana Cichanoŭskaja nie padychodzić na rolu lidara krainy.

— Kali bolšaść nasielnictva Biełarusi ŭsio ž zachoča adstaŭki prezidenta? — zapytalisia ŭ pasła.

— Tady ja pasłuchaju ludziej, — adkazaŭ Jeŭdačenka.

• 0
• 0
• 0
• 0
• 0
• 0
• 0
• 0