«Ja i maje kalehi nie zhodnyja z hetym». Minski pažarny asudziŭ vykarystańnie MNS dla baraćby z nacyjanalnaj simvolikaj
Pažarny Illa Maržeŭski z pažarnaj čaści numar 26 Minska źviarnuŭsia da biełarusaŭ. Jon vykazaŭ salidarnaść z supracoŭnikami MNS, zvolnienymi pa palityčnych matyvach, i z zatrymanymi ratavalnikami Asvoda. «Ja i mnohija maje kalehi nie zhodnyja z hetym», — kaža jon.
«Na žal, kiraŭnictva Ministerstva pa nadzvyčajnych situacyjach biare aktyŭny ŭdzieł u sprobach padzialić naša hramadstva — padzialić pa kolery ściaha, palityčnych pierakanańniach, ideałohii», — skazaŭ jon.
Svaju zajavu jon začytaŭ z nacyjanalnym i dziaržaŭnym ściahami na plačach.
«My stali śviedkami taho, jak nieviadomyja ludzi ŭ maskach zachapili pažarnyja aŭtamabili i vykarystoŭvajuć ich u metach, nie źviazanych z ratavańniem ludziej», — kaža jon pra vykarystańnie mašyn MNS dla zdymańnia nacyjanalnych ściahoŭ.
«Chto stanie adkryvać dźviery pažarnym, kali zamiest ich mohuć prybyć ludzi ŭ maskach? Ci buduć sastupać darohu pažarnym aŭtamabilam, kali jany mohuć jechać nie na dapamohu ludziam?» — pytajecca pažarny na videa.
«Ad siabie asabista chaču prynieści prabačeńni ŭsim hramadzianam, jakich źniavažyli hetyja dziejańni, — kaža Illa Maržeŭski. — Kali łaska, nie hublajcie davieru da pažarnych. Naša paklikańnie — heta davier ludziej, niezaležna ad palityčnych pohladaŭ», — skazaŭ Maržeŭski.
Raniej internet abyšli kadry, jak ratavalniki MNS na vyšcy nie źniali nacyjanalny ściah u Malinaŭcy ŭ Minsku, a raspravili jaho i pakinuli. Paźniej hety ściah źniali z vyški asoby ŭ maskach.
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie9
Kamientary