Naziralniki: «Družnaja jaŭka 9-ha aholić prypiski na daterminovym»

Družnaja jaŭka vybarcaŭ 9-ha hetym razam radykalna aholić falsifikacyi na daterminovym hałasavańni.

Takoje pradkazańnie zrabili «Našaj Nivie» piać naziralnikaŭ z Frunzienskaha i Savieckaha rajonaŭ Minska, a taksama Bresta, Homiela i Minskaha rajona.

Bolšaść naziralnikaŭ, u tym liku piać našych surazmoŭcaŭ, adznačajuć, što ličby ŭ pratakołach daterminovaha hałasavańnia zavyšanyja — u siarednim u try razy. U adnaho z naziralnikaŭ u Minsku razychodžańnie — u 5 razoŭ. U druhoj, u Minskim rajonie, — usiaho na 20 čałaviek, jakich staršynia kamisii patłumačyła hałasami «supracoŭnikaŭ dadzienaj ustanovy, jakija zachodzili na ŭčastak znutry, a nie z dvara» (naziralnica adzin ź dzion nie była dapuščanaja ŭnutr, pilnavała na ŭvachodzie).

Tady, kali na ŭčastki 9-ha pryjdzie, dapuścim, 80% vybarcaŭ, to ahulnaja suma pieravysić 100%.

Zboj sistemy?

A što tady zrobiać falsifikatary?

1) Samyja zajadłyja falsifikatary ŭžo rychtujucca da takoha varyjantu. Na niekatorych učastkach, naprykład u Savieckim rajonie Minska, staršyni kamisij admovilisia nazvać naziralnikam ahulnuju kolkaść vybarcaŭ na ŭčastku, nazvali tolki ahulnuju kolkaść atrymanych biuleteniaŭ.

2) Akramia taho, naziralniki miarkujuć, što ich 9-ha pastarajucca nie padpuścić da padliku ahulnaj kolkaści vybarcaŭ, buduć vydalać i zatrymlivać. Choć, adznačyli troje z našych surazmoŭcaŭ, milicyja nie ščyruje z hetym, starajecca pa-ludsku źmiakčać situacyi, asabistyja simpatyi pravaachoŭnikaŭ jaŭna nie na baku staršyń kamisij. Heta adznačyli naziralniki i ŭ Minsku, i ŭ Homieli.

3) Naziralniki razumiejuć, što ich padlik nie abaviazkova paŭpłyvaje na ličby, jakija ŭpišuć u pratakoły. Bo sistema falsifikacyi pradumanaja chitra. Asobnyja členy kamisij padličvajuć svaje stosy i kažuć svaje ličby staršyni kamisii. A jon užo «sumiruje» i nazyvaje vynikovyja ličby. Heta farmalna pakidaje ruki šarahovych členaŭ kamisij «čystymi». Maŭlaŭ, u mianie to bolšaść była za A, ale, moža, u kaleh ŭsie hałasy byli za B, voś jon i pieramoh (choć tak nie byvaje).

Tym nie mienš, «usie ŭsio razumiejuć», skazali nam členy kamisij, ź jakimi my havaryli.

Adroźnieńnie hetych vybaraŭ ad minułych naziralniki bačać u tym, što minułyja razy častka pratestavaha elektaratu zastavałasia doma, hetym i možna było pakryvać «dakinutyja» na daterminovym hałasy. Chto prychodziŭ na ŭčastak u kancy dnia, bačyŭ amal pustyja viedamaści vybarcaŭ, a paśla čyk — i vynikovaja jaŭka ŭ pratakołach składaje 80-90 pracentaŭ, voś takaja była typovaja situacyja minułych hadoŭ na falsifikavanych učastkach. Sioleta ŭsio składajecca inakš.

Jak pakazvaje dastupnaja nam sacyjałohija, Cichanoŭskaja fienamienalna zhurtavała i apazicyjny elektarat, i «centr», i vybarcaŭ Babaryki, i vybarcaŭ Sieviarynca. Cichanoŭskaja tamu i prasiła nastojliva hałasavać, hałasavać i hałasavać — u asnoŭny dzień hałasavańnia.

Daśviedčanyja naziralniki pradkazvajuć, što ŭ vyniku sioleta rezka, u paraŭnańni ź minułymi vybarami, źmienšycca dola vybarcaŭ, jakija «prahałasavali» na damu. Raniej takim sposabam falsifikatary naciahvali jaŭku, ciapier, naadvarot, jany buduć staracca zamienšyć jaje ŭ asnoŭny dzień hałasavańnia.

Taksama jany čakajuć akcyj zastrašvańnia, u tym liku, mahčyma, zatrymańniaŭ aktyvistaŭ i naziralnikaŭ i adklučeńnia internetu ŭ dzień vybaraŭ, kab adstrašyć ludziej ad vychadu z domu i ŭdziełu ŭ hałasavańni. U toj ža čas šarahovy hramadzianin takuju situacyju budzie ŭsprymać, chutčej, niehatyŭna, i efiekt ad ich niepradkazalny, jany mohuć rezka spravakavać vychad na vuličnyja pratesty viečaram 9-ha i 10-ha.

I družnaja jaŭka 9-ha, i realnyja vyniki hałasavańnia nie buduć sakretam dla šarahovych členaŭ kamisij, a heta dziasiatki tysiač ludziej, upeŭnienyja naziralniki. I ŭskrytyja fakty buduć mieć upłyŭ na hramadstva, tym bolš što ź vialikaj dolaj imaviernaści ŭžo viečaram 9-ha prahučać i vyniki niezaležnych sacyjałahičnych daśledavańniaŭ. Akramia taho, pracuje sistema «Hołas», dzie zarehistravałasia bolš za 900 tysiač vybarcaŭ, i sajt zubr.in, jaki akumuluje źviestki ź miescaŭ. Realny vynik vybaraŭ kraina, chutčej za ŭsio, daviedajecca ŭžo 9-ha, navat kali jaho buduć pieradavać z vusnaŭ u vusny. 

• 0
• 0
• 0
• 0
• 0
• 0
• 0
• 0