«Navahodnija pryhody ŭ lipieni» — novaja stužka «Biełaruśfilmu»
Daška Katastrofa i jejny siabra Saša z dapamohaju kluški i złamanaj ladoŭni traplajuć u virtualny śviet, dzie panuje kamputarny Hała-Virus.
Navahodnija pryhody ŭ lipieni (Novohodnije priklučienija v ijule)
Biełaruś, 2009, kalarovy, 76 chv.
Režysiory: Alena Turava, Ivan Paŭłaŭ
Roli vykonvajuć: Maryja Zabara, Vasil Kubiekin, Ihar Bočkin, Daniił Śpivakoŭski, Pavał Adamčykaŭ, Arsieni Siačko, Dźmitry Pustylnik, Siarhiej Žuraviel
Žanr: Kazačnyja muzyčnyja pryhody pavodle scenaru Aleny Turavaj
Daška Katastrofa i jejny siabra Saša z dapamohaju kluški i złamanaj ladoŭni traplajuć u virtualny śviet, dzie panuje złobny kamputarny Hała-Virus. Uładalubny Virus maryć źniščyć usie śviaty i asabliva Novy hod – razam sa Śniahurkaju i Dziedam Marozam. Ale Virus niedaacaniŭ sučasnych dzietak…
Karcina, źniataja Alenaj Turavaj (dačkoj režysiora Viktara Turava) dyj Ivanam Paŭłavym – heta kamputarnaja hałavałomka, što sprabuje viarnuć załatyja časy biełaruskaj dziciačaha kino.
Sama lepšaje ŭ filmie – hrafika, animacyja i dyzajn – niečuvanyja dla sučasnaj Nacyjanalnaje kinastudyi (a kali b stužka vyjšła by ŭ 90-yja hady, heta, uvohule, stałasia b pieravarotam).
Fijaletavyja hryby i vohniennaja žančyna; ledzianyja pieraŭtvareńni – i miesiacovyja łandšafty, dzie vuścišnyja raśliny hrajuć u futboł harmatnym jadrom (maleńkaja dziaŭčynka ŭ kinateatry pryciskałasia da matuli: «Mama, mnie strašna!»). Čornyja viežy i hralny aŭtamat-robat; tvar čałavieka-śniehavika. Narešcie, samaje smačnaje – solnyja numary Hała-Virusa (Daniił Śpivakoŭski). Jon to pirat, to Hienierał, to čarnaknižnik (za kožnym – svaja kinatradyja). Hlučnyja kambinavanyja kadry, marš-parad złych siłaŭ; mocnaja i praćvitajučaja virusałandyja.
Niahodniki ŭ karcinie – vyraznyja: Spam (naviaźlivy rekłamny ahient, jaki maryć pra cyrkavoje šoŭ); Hluk – tarmaznuty narkuša-chipi; płatajadnaja hratesknaja babka (Siarhiej Žuraviel).
Zatoje dabro, jak i ŭ filmie «Na śpinie ŭ čornaha kata» – ścišanaje i mlavaje. Dzietki-hieroi, u lepšym vypadku – piersanažy kamputarnaha kviestu, jakija zmahajucca za natužliva-ananimnaje śviata.
Scenar – samaje słaboje ŭ karcinie. Stužka – nabor kamputarnych atrakcyjonaŭ, raździelenych paziachańniami hledača.
Ale dla «Biełaruśfilmu» – heta ŭžo niešta žyvoje i niestandartnaje.
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy20
Kamientary