Biełaruskija hurty zapisali pratestnuju pieśniu na vierš Niaklajeva KLIP

Hurt «Naka» ź lidarami hurtoŭ «DZIECIUKI», «Pietla pristrastija», «RSP» i «Rostany» zapisali pieśniu na vierš Uładzimira Niaklajeva «VAM». Uładzimir Niaklajeŭ napisaŭ hety vierš paśla Płoščy 2010 hoda, kali vyjšaŭ z turmy, ale apublikavaŭ tolki sioleta 5 lipienia. Pieśnia pryśviečana apošnim palityčnym padziejam u krainie.

Dzianis Tarasienka, hurt «RSP»: Pieśnia atrymałasia ščyraj, praŭdzivaj i pra samaje nabalełaje. Čałaviečaje niahodnictva nielha apraŭdać ni słužbaj, ni abstavinami, ni zahadami. Tolki maralny vybar charaktaryzuje čałavieka. U našaj ahulnaj siońniašniaj situacyi hety vybar aktualny jak nikoli. I kožny čałaviek adkazny za svoj vybar.

Illa Čarapko, hurt «Pietla pristrastija»: Nakont pieśni: było b dziŭna nie vykazacca niejkim čynam, nie vyrazić svaje adnosiny nakont taho, što adbyvajecca. Asabliva ŭ momant, kali kansalidacyja hramadstva nieabchodnaja jak nikoli. Ułasna, pieśnia hetaja i źjaŭlajecca demanstracyjaj taho, što ŭ dadzieny momant ludzi, što majuć adnosiny da tvorčaści, vystupajuć adzinym frontam.

Alaksandr Dzianisaŭ, hurt «DZIECIUKI»: Mnie adrazu ŭsio spadabałasia, i ja adrazu ž zhadziŭsia, bo pieśnia vielmi dobraja. Ci zrabiŭ ja niešta, kab jana stała lepš — niachaj aceńvajuć słuchačy. Što jašče skazać? Afihiennaja pieśnia!

Viktar Rudenka, hurt «Rostany»: Mnie vielmi pašancavała ź niaklajeŭskimi radkami, jakija ja vykonvaju ŭ pieśni. Jany całkam pra mianie, da kožnaj litary. Sapraŭdy, «kab nie zdochnuć» pradavaŭ vieršy, a jašče naziraŭ, jak pradajecca toje, što pradavacca nie pavinna. I ŭ cełym usio mienavita pra skradzienyja 26 hadoŭ majho žyćcia, u jakim ja płanavaŭ być značna bolš śmiełym artystam, značna bolš ambicyjnym i karysnym hramadzianinam majoj Biełarusi — zusim inšym «ja». Pieśnia pra hady, spalenyja ŭ nadziejach i rastaptanyja ŭ brudzie bieznadziejnaści, pieśnia adčaju i złości.

Anastasija Špakoŭskaja, hurt «Naka»: Pieśnia pisałasia lohka, na adnym dychańni, bo słovy Uładzimira Niaklajeva zaraz blizkija kožnamu biełarusu. Ja ad usiaho serca dziakuju ŭsim nieraŭnadušnym, z kim razam stvarałasia hetaja pieśnia. Ja ad usioj dušy ŭdziačnaja ŭsim, kaho jana natchnić apamiatacca i nie sadziejničać podłaści i padmanu.

Videaklip na pieśniu źniaŭ i zmantavaŭ pry sadziejańni kampanii «Hodna» režysior Alaksandr Duchan.

• 0
• 0
• 0
• 0
• 0
• 0
• 0
• 0