«Ja nie źbirała podpisy». Dźviuch nastaŭnic uklučyli ŭ vybarčuju kamisiju ŭ abychod zakonu
Raskazvajem, jak vybarčyja kamisii ŭzhadniajuć «svaich» ludziej, parušajučy zakanadaŭstva.
Minčanka Luboŭ Kavalčuk sprabavała patrapić u vybarčuju kamisiju ŭčastka №42 Pieršamajskaha rajona stalicy. Sabrała nieabchodnyja 10 podpisaŭ, ale jaje nie ŭklučyli: na pasiadžeńni dva čałavieki prahałasavali «za», vosiem «suprać» i adzin ustrymaŭsia. Pryčynu, naturalna, nie tłumačyli.
Luboŭ vyrašyła pajści ŭ sud. Skarhu tam nie zadavolili. Ale pry aznajamleńni z materyjałami spravy žančyna zaŭvažyła cikavuju reč:
dvuch čałaviek, jakich uklučyli ŭ kamisiju, vyłučali adny i tyja ž hramadzianie. Supadajuć usie 10 podpisaŭ u zajaŭkach, navat ich paśladoŭnaść.
Heta hrubaje parušeńnie zakanadaŭstva. Zhodna z artykułam 35 Vybarčaha kodeksa, hramadzianie mohuć vyłučać u kamisiju tolki pa adnym pradstaŭniku.
Tyja dźvie zajaŭki z adnolkavymi podpisami padali piedahohi 61-j škoły Minska — nastaŭnica pačatkovych kłasaŭ Vieranika Harbačova i nastaŭnica hieahrafii Halina Repina. Bolšaść tych, chto padpisaŭsia ŭ ich padtrymku, abo pracujuć u 61-j škole, abo raniej pracavali, abo znachodziacca ŭ svajackich stasunkach.
«Naša Niva» źviazałasia z nastaŭnicami. Halina Repina ničoha kamientavać nie stała. Vieranika Harbačova, pačuŭšy pra adnolkavyja podpisy, razhubiłasia.
«Ja nie mahu adkazać na hetaje pytańnie, ja nie viedaju», — adkazała jana.
«NN»: Moža, vy razam z Repinaj ich źbirali?
«Nie, ja nie źbirała podpisy… Ja nie viedaju, čamu takaja kolkaść adnolkavaja. Moža, heta źbieh abstavin, supadzieńnie», — sprabavała patłumačyć Harbačova.
My patelefanavali taksama kiraŭniku Pieršamajskaha rajona Minska Dźmitryju Šašku, jaki zaćviardžaŭ kandydatury. Niaŭžo jon nie zaŭvažyŭ supadzieńnia ŭ zajaŭkach?
Dźmitryj Šašok: Pieršy raz čuju, mnie treba daviedacca. Prabačcie, nie mahu ničoha prakamientavać.
«NN»: A vy podpisy nie praviarali, kali ich vam zdavali?
Dźmitryj Šašok: Praviarali… Ščyra, nie viedaju. Nie mahu ni admaŭlać, ni paćviardžać.
«NN»: Dyk a rabić štości budziecie z hetym?
Dźmitryj Šašok: Praviarać infarmacyju vašu zaraz. Prabačcie, usio.
Ciapier čytajuć
Što za Dźmitryj Skindzieraŭ, jaki abviaściŭ vajnu Cichanoŭskaj? Supracoŭnictva z HUBAZiKam, daŭhi ŭ Biełarusi, daŭhi ŭ Litvie12
Kamientary