Pamior saviecki dysident Uładzimir Bukoŭski

U niadzielu ŭviečary ŭ Vialikabrytanii pamior viadomy pradstaŭnik savieckaha dysidenckaha ruchu, piśmieńnik, publicyst i hramadski dziejač Uładzimir Bukoŭski, piša bbc.com.

«Uładzimir Kanstancinavič Bukoŭski pamior ad spynieńnia serca ŭ balnicy ŭ Kiembrydžy ŭ 21.30 pa miascovym časie 27 kastryčnika 2019 hoda. Jamu było 76 hadoŭ. U apošnija hady ŭ jaho było słaboje zdaroŭje», — paviedamiŭ aficyjny sajt Bukoŭskaha.

Uładzimir Bukoŭski byŭ adnym z zasnavalnikaŭ dysidenckaha ruchu ŭ Savieckim Sajuzie.

U 1960 hodzie jon, student MDU, pačaŭ naviedvać valnadumnyja paetyčnyja čytańni la pomnika Majakoŭskamu ŭ centry Maskvy. Niekalki aktyvistaŭ «Majakoŭki» byli aryštavanyja.

Sam Bukoŭski byŭ upieršyniu aryštavany ŭ 1963 hodzie za vyrab fotakopij zabaronienaj u SSSR knihi.

Paśla vychadu na volu ŭ 1965 hodzie jon uziaŭ aktyŭny ŭdzieł u padrychtoŭcy mitynhu ŭ abaronu Andreja Siniaŭskaha i Julija Daniela, za što znoŭ byŭ zatrymany i hvałtoŭna skiravany ŭ psichijatryčnuju balnicu. 

Bukoŭski byŭ vyzvaleny ŭ žniŭni 1966 u vyniku aktyŭnaj kampanii ŭ jaho abaronu, razhornutaj na Zachadzie.

Paśla hetaha jaho nieadnarazova aryštoŭvali za arhanizacyju akcyj pratestu i «antysavieckuju dziejnaść». Bukoŭski pravioŭ 12 hadoŭ u źniavoleńni i na prymusovym lačeńni.

U 1971 hodu Bukoŭski pierapraviŭ na Zachad 150 staronak dakumientaŭ, jakija vykryvali represiŭnyja mietady savieckaj psichijatryi ŭ palityčnych metach.

U 1972 hodu Bukoŭski byŭ asudžany za «antysavieckuju ahitacyju» na dva hady turmy i piać hadoŭ vysyłki.

«My ŭsie, usie dysydenty kazali, što palityka pavinna być maralnaj. I my paŭstali nie jak palityčny ruch. My byli rucham maralnym. Naš asnoŭny impuls byŭ nie pierarabić Rasiju, a prosta nie być udzielnikami złačynstva. Ci nie stać častkaj režymu. Heta byŭ samy mahutny matyŭ». Uładzimir Bukoŭski, 2014 hod.

U 1978 hodu Uładzimira Bukoŭskaha, jaki adbyvaŭ termin u kałonii, abmianiali na lidara Kamunistyčnaj partyi Čyli Łuisa Korvałana.

Bukoŭski pasialiŭsia ŭ Vialikabrytanii, skončyŭ Kiembrydžski ŭniviersitet, pisaŭ knihi i praciahvaŭ zajmacca palityčnaj dziejnaściu.

Uładzimir Bukoŭski — aŭtar niekalkich knih (u tym liku «I viartajecca viecier», «Listy ruskaha vandroŭnika» i «Pabudavać zamak»), a taksama šmatlikich artykułaŭ i ese.

U 1991 hodzie Bukoŭski pa zaprašeńni Barysa Jelcyna ŭpieršyniu paśla vysyłki naviedaŭ Maskvu.

U 2007 hodzie Bukoŭski byŭ vyłučany kandydatam u prezidenty Rasii ad demakratyčnaj apazicyi na vybarach 2008 hoda, adnak jaho kandydatura była adchilenaja Centrvybarkamam RF.

U 2015 hodzie Karaleŭskaja prakurorskaja słužba Vialikabrytanii vystaviła Bukoŭskamu abvinavačvańni ŭ vytvorčaści i zachoŭvańni dziciačaj parnahrafii.

Bukoŭski adkinuŭ abvinavačvańni ŭ svoj adras i padaŭ sustrečny pazoŭ na prakuroraŭ za naniasieńnie škody jaho reputacyi.

U sakaviku 2015 hady jon pieranios ciažkuju apieracyju na sercy ŭ pryvatnaj klinicy ŭ Hiermanii.

Sud nad Uładzimiram Bukoŭskim niekalki razoŭ adkładaŭsia i u 2018 hodzie byŭ prypynieny z-za jaho słaboha zdaroŭja.

• 0
• 0
• 0
• 0
• 0
• 0
• 0
• 0