Daviadzieńnie da samahubstva. Hienprakuratura prymusiła SK raspačać spravu praz hod paśla śmierci sałdata
Sałdat terminovaj słužby Alaksandr Arłoŭ zahinuŭ u słonimskaj častcy ŭ vieraśni 2018 hoda, nahadvaje Radyjo Svaboda.
Alaksandar Arłoŭ pachodziŭ ź vioski Krasnaje Karelickaha rajonu. U vojska pajšoŭ u 2017-m, słužyŭ majstram absłuhoŭvańnia akumulatarnych batarej u adnym z bataljonaŭ 11-j asobnaj mechanizavanaj bryhady ŭ Słonimie. U lipieni 2018-ha pryjaždžaŭ u zvalnieńnie dadomu. 5 vieraśnia 2018 hodu Minabarony apublikavała paviedamleńnie pra jahonuju śmierć.
«5 vieraśnia ŭ adnoj z vajskovych častak Słonimskaha harnizonu ŭčyniŭ suicyd šarahoviec Arłoŭ A.V., — havaryłasia ŭ aficyjnym paviedamleńni Minabarony. — Vajskoŭcu 20 hadoŭ, da zakančeńnia słužby jamu zastavałasia krychu bolš za paŭhoda. Papiarednie: pryčyna suicydu abumoŭlenaja asabistymi abstavinami i nie źviazanaja z prachodžańniem vajskovaj słužby. Pa hetym fakcie pravodzicca pravierka Śledčym kamitetam, u vajskovaj častcy pracuje kamisija Ministerstva abarony».
Z aficyjnaj versijaj śmierci Alaksandra Arłova adrazu nie pahadzilisia jahonyja rodnyja. Pierad pachavańniem jany sfatahrafavali cieła; na zdymkach vidać šmatlikija paškodžańni. U tym liku padvojnaja stranhulacyjnaja barazna na šyi. Maci Alaksandra Volha napisała zajavu ŭ Śledčy kamitet i stała čakać zaviadzieńnia spravy. Pravierku spačatku pravodziŭ miascovy SK, zatym abłasny, potym centralny.
22 traŭnia 2019 hodu śledčy ŭ asabliva važnych spravach Centralnaha aparatu Śledčaha kamitetu S. Bałanoŭski pastanaviŭ admović u zaviadzieńni kryminalnaj spravy pa fakcie śmierci Alaksandra Arłova. Žančyna z dapamohaj jurystaŭ padała pozvu ŭ sud i skarhu ŭ Hieneralnuju prakuraturu. Adkaz z apošniaj pryjšoŭ napiaredadni hadaviny śmierci syna.
«Hieneralnaj prakuraturaj Respubliki Biełaruś razhledžana vaša skarha na pastanovu ab admovie ŭ zaviadzieńni kryminalnaj spravy, vyniesienaje 1.07.2019 Śledčym kamitetam Respubliki Biełaruś pa vynikach dadatkovaj pravierki pa fakcie hibieli vašaha syna Arłova A.V., — havorycca ŭ liście z Hienprakuratury. — Paśla vyvučeńnia materyjałaŭ pravierki hetaja pastanova 29.08.2019 mnoj admieniena i zaviedziena pa fakcie hibieli Arłova A.V. kryminalnaja sprava pavodle prykmiet złačynstva, praduhledžanaha častkaj 1 artykułu 145 KK «Daviadzieńnie da samahubstva»…»
Kryminalnaja sprava pieradadzienaja ŭ Śledčy kamitet dla raśśledavańnia. Pra jaho vyniki žančynie abiacajuć paviedamić. Za chodam śledztva budzie sačyć staršy prakuror upraŭleńnia nahladu za vykanańniem zakanadaŭstva Śledčym kamitetam Hryńko.
«Atrymała hety list za dzień da hadaviny śmierci Sašy, — kaža maci zahinułaha sałdata Volha. — My skarhu jašče na pačatku žniŭnia napisali, kali ŭ SK nam paviedamili pra kančatkovuju admovu pačynać kryminalnuju spravu. Ja ŭžo dumała, što ŭsio, što nichto nia budzie ničoha raśśledavać. A tut hety list».
Novyja śledčyja z žančynaj pakul nia źviazvalisia. Volha pa-raniejšamu pierakananaja, što jaje syn staŭ achviaraj zabojstva.
Ciapier čytajuć
Daišnik, jakoha źbiŭ mašynaj piensijanier pad Minskam, pamior u balnicy. Jamu zładzili pyšnaje pachavańnie18
Kamientary