Premjer-ministr Brytanii Tereza Mej i prezident Rasii Uładzimir Pucin praviali sustreču na palach samitu «Vialikaj dvaccatki» ŭ japonskaj Osacy. Hetaja sustreča stała pieršaj paśla napadu na Siarhieja i Juliju Skrypaloŭ u Sołśbiery, piša bbc.com.
U časie sustrečy Mej skazała Pucinu, što «narmalizacyi dvuchbakovych adnosinaŭ być nie moža, pakul Rasija nie spynić svaju biezadkaznuju i destabilizujučuju dziejnaść, jakaja pahražaje Vialikabrytanii i jaje sajuźnikam», zajavili ŭ ofisie brytanskaha premjer-ministra.
U pryvatnaści, Mej zakranuła atručvańnie Skrypaloŭ. «Jana jasna dała zrazumieć, što Vialikabrytanija vałodaje nieabvieržnymi dokazami taho, što za hetym napadam stajała Rasija, - [dokazami,] atrymanymi šlacham starannaha rasśledavańnia i supracoŭnictva z našymi sajuźnikami», — adznačajecca ŭ zajavie Daŭninh-stryt.
Premjer-ministr zajaviła na sustrečy, što takija pavodziny nikoli nie pavinna paŭtarycca i što Vialikabrytanija chacieła b, kab dvoje abvinavačanych u zamachu na Skrypaloŭ paŭstali pierad sudom.
Mej taksama padkreśliła, što Brytanija «praciahnie abaraniać demakratyju, pravy čałavieka i roŭnaść dla ŭsich hrup, u tym liku ŁHBT», dadali ŭ pres-słužbie premjera.
«Rasija nie vydaje svaich hramadzian, ale na hetych dvuch čałaviek vydadzieny jeŭrapiejski ordar na aryšt, i kali jany vyjeduć za miežy Rasii, my prykładziom usie namahańni dla taho, kab jany paŭstali pierad sudom», — zajaviła Mej.
«Rasieja pavinna pryznać svaje dziejańni, spynić dziejničać padobnym čynam i spynić inšuju destabilizujučuju dziejnaść pa ŭsim śviecie - uklučajučy, naprykład, vykarystańnie dezinfarmacyi i kibierataki», — dadała premjer-ministr Vialikabrytanii.
Ciapier čytajuć
Dla kaho sabralisia budavać vielizarny vantavy most u Minsku?3
Kamientary