Kiraŭnika RNPC traŭmatałohii i artapiedyi akademika Bialeckaha prysudzili da vialikaha terminu ŭ kałonii

Minski haradski sud pryhavaryŭ navukoŭca, akademika, łaŭreata Dziaržpremii, viadomaha doktara Alaksandra Bialeckaha da 7,5 hadoŭ pazbaŭleńnia voli. Jaho pryznali vinavatym pa č. 3 art. 430 KK (Atrymańnie chabaru ŭ asabliva bujnym pamiery).

U vyniku akademika pryznali vinavatym i prysudzili da 7 hadoŭ i 6 miesiacaŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści. Takoje ž pakarańnie raniej i zapatrabavaŭ prakuror.

Alaksandr Bialecki pryjechaŭ za piać chvilin da pasiadžeńnia. La zały jaho čakali rodnyja i siabry — čałaviek 20. Sam Bialecki da abviaščeńnia prysudu pavodziŭ siabie spakojna: razmaŭlaŭ ź siabrami, zatym sieŭ na łavu i skłaŭ ruki.

Prysud nie ŭstupiŭ u zakonnuju siłu. Bialeckaha ŭziali pad vartu ŭ zale suda i nadzieli na jaho kajdanki.

Da lipienia 2018 hoda Alaksandr Bialecki ŭznačalvaŭ RNPC traŭmatałohii i artapiedyi. Na sudach akademik nie admaŭlaŭ, što ŭ jakaści padarunka atrymaŭ 4 tysiačy jeŭra i 3 tysiačy dalaraŭ. Pry hetym jon nie ŭsprymaŭ hetyja hrošy jak chabar. A adnu z sum patraciŭ na kanhres u Barsiełonie, dzie ŭ skład biełaruskaj delehacyi ŭvachodziła 12 čałaviek.

Bialecki ŭ sudzie kazaŭ, što raskajvajecca ŭ zroblenym.

— Samaje strašnaje — heta samajedstva. Heta horš za ŭsialaki sud, prakurora i śledčaha, — adznačaŭ jon.

Bujnyja ž sumy, jakija byli znojdzienyja ŭ jaho doma i na ŭkładach, pa jaho słovach, jamu davali zamožnyja siabry, i heta nie było źviazana ź jaho prafiesijnaj dziejnaściu. Adzin z takich siabroŭ — biznesmien Alaksandr Šakucin.

Raniej staršynia KDB Valeryj Vakulčyk kazaŭ, što pry vobšuku ŭ haražy i pa miescy žycharstva Bialeckaha ŭ schovankach znajšli kala $ 500 tys. u ekvivalencie.

Alaksandr Bialecki — unikalny ŭ svajoj halinie doktar. Jon viadomy vučony i akademik. U jaho bolš za 450 drukavanych prac, u tym liku 16 manahrafij, ź ich vosiem vydadzienyja za miažoj. Za svajo prafiesijnaje žyćcio jon padrychtavaŭ čatyroch daktaroŭ i šeść kandydataŭ miedycynskich navuk.

U kastryčniku, pakul Alaksandr Bialecki znachodziŭsia ŭ SIZA, jaho ŭznaharodzili miedalom NAN. Jon vyras u siamji daktaroŭ i ŭsio žyćcio byŭ dziciačym artapiedam. Pravioŭ 4000 vysokatechnałahičnych składanych apieracyj.

Akramia hetaha, u jaho 92 patenty ŭ lačeńni dziaciej z patałohijami tazaściehnavych sustavaŭ, u 2010-m hodzie jon atrymaŭ zvańnie «Zasłužany dziejač navuki». Źjaŭlajecca vydatnikam achovy zdaroŭja Rasii, Uźbiekistana, Biełarusi, čytaŭ lekcyi ŭ mnohich krainach śvietu, vystupaŭ na amierykanskaj asacyjacyi chirurhaŭ. Pa jaho słovach na sudzie, hrošy za Dziaržpremiju, patenty, manahrafii jon adkładaŭ.

• 0
• 0
• 0
• 0
• 0
• 0
• 0
• 0