Papa Francišak u Vilni: «Na hetych ziemlach usie znachodzili sabie dom: litoŭcy, tatary, palaki, ruskija, biełarusy, ukraincy, armianie, niemcy, jaŭrei»
22 vieraśnia paśla 11:00 u Vilenskim aeraporcie zrabiŭ pasadku samalot z Papam Rymskim Franciškam.
Jak pieradaje DELFI, Papu Franciška sustreła dziaržaŭnaja delehacyja, u składzie jakoj byli prezident Litvy Dala Hrybaŭskajcie, premjer-ministr Saŭlus Skviernialis, śpikier Viktaras Parnckiecis, eks-prezident Vałdas Adamkus, staršynia Viarchoŭnaha savieta — Adnaŭlenčaha sojma Vitaŭtas Łandśbierhis, ministr zamiežnych spraŭ Linas Linkiavičus, pasoł Litvy pry Śviatym pasadzie Piatras Zapołskas.
Pa darozie z aeraporta Papa vitaŭ ludziej.
Paśla 12:00 Papa prybyŭ ź vizitam u prezidencki pałac, na płoščy pierad jakim jon sustreŭsia z pradstaŭnikami ŭłady i hramadzianskaj supolnaści, členami dypłamatyčnaha korpusa.
U prezidenckim pałacy adbyłasia paŭhadzinnaja sustreča Papy z prezidentam Litvy Dalaj Hrybaŭskajcie. Na aficyjnaj cyrymonii pierad hutarkaj adbyŭsia abmien padarunkami: Papa padaryŭ Hrybaŭskajcie mazaičny abraz z vyjavaj Chrysta, prezident padaryła Papu kopiju zvana svabody Litvy i zapis tvora Gloria Lietuvai.
Papa ŭ svaim zvarocie da žycharoŭ Litvy, jaki prahučaŭ paśla sustrečy z Hrybaŭskajcie, źviarnuŭsia da hramadzian słovami himna Litvy: «U minułym tvaje syny niachaj siłu čerpajuć» i kazaŭ pra stahodździe krainy.
«Hetaje stahodździe dla vas było adznačana mnostvam vyprabavańniaŭ i pakut: turmami, vysyłkami, pakutami. Śviatkavańnie stahodździa niezaležnaści — heta padstava dla taho, kab spynicca i ŭzhadać hety dośvied, abnavić suviaź z tym, chto vyhadavaŭ vašu dziaržavu, znajści rašeńni siońniašnich vyklikaŭ i hladzieć u budučyniu ŭ duchu dyjałohu i adzinstva z usimi tymi, chto žyvie tut, imknučysia, kab nichto nie adčuvaŭ siabie izhojem», — skazaŭ Papa Francišak.
Pa słovach papy, kožnaje pakaleńnie pavinna ŭśviadomić składanaści i dasiahnieńni minułaha i ŭšanavać pamiać svaich prodkaŭ. «Ja nie viedaju, što budzie zaŭtra, ale my viedajem, što kožnaje pakaleńnie pavinna šanavać «duch», jaki hetaje pakaleńnie vypiestavaŭ i dapamoh kožnuju vočnuju staŭku z bolem i niespraviadlivaściu pieratvaryć u mahčymaść. Tolki tak karani, jakija dapamahli vyhadavać siońniašnija płady, zastanucca žyćciazdolnymi i zdarovymi. A ŭ hetaha naroda nasamreč mocny «duch», jaki dapamoh jamu nie złamacca i ŭvieś čas tvaryć! Voś radok z vašaha himna: «U minułym tvaje syny niachaj siłu čerpajuć», kab śmieła hladzieć u vočy sučasnaści», — skazaŭ Papa Francišak.
Papa adznačyŭ, što za ŭsiu svaju historyju Litva zdoleła sabrać, dać prytułak ludziam roznaj nacyjanalnaści i vieravyznańnia.
«Na hetych ziemlach ŭsie znachodzili sabie dom: litoŭcy, tatary, palaki, ruskija, biełarusy, ukraincy, armianie i niemcy, kataliki, pravasłaŭnyja, pratestanty, staraviery, musulmanie i jaŭrei — usie mirna žyli razam, pakul nie pryjšła tatalitarnaja ideałohija, hvałt i niedavier jakoj padkasili zdolnaść pryniać inšaha i nie nadavać značeńnia adroźnieńniam», — skazaŭ Papa.
Pantyfik adznačyŭ, što čerpajučy siłu ź minułaha, my znoŭku znachodzim hetyja karani i adnaŭlajem ich, u hetym naša vyklučnaść i samabytnaść (…): talerantnaść, haścinnaść, pavaha i salidarnaść. «Hledziačy na śviet našych dzion (…) vy, litoŭcy, pavinny skazać svajo słova: «Pryniać adroźnieńni», — skazaŭ Francišak.
«Zaviazvajučy dyjałoh, budučy adkrytymi i spahadlivymi, vy možacie stać mostam pamiž Uschodniaj i Zachodniaj Jeŭropaj», — dadaŭ jon.
Pa słovach papy Franciška, vychoŭvać u sabie hetyja jakaści Litvie dazvolać «płady śpiełaj historyi, jakija vaš narod moža prapanavać suśvietnaj supolnaści, a asabliva jeŭrapiejskaj supolnaści».
Paśla abiedu na podstupach da Vostraj bramy sabralisia tysiačy ludziej, kab pamalicca razam z Papam Franciškam.
30-hadovaja Irena Hajdoskaja, kab ubačyć Papu pryjechała ź biełaruskaj Horadni: «Ja ŭpieršyniu na takim mierapryjemstvie, daŭno chacieła ŭbačyć Papu, kab adčuć hety duch adzinstva chryścijan».
81-hadovaja Danuta Hajlišenie, jakaja pražyvaje na ŭskrainie Vilni, raspaviała, što časta prychodzić pamalicca ŭ kaplicu Śviatoj Bramy, tamu nie mahła prapuścić nahody zrabić heta razam z Papam Franciškam.
34-hadovy žychar Vilni Mindaŭhas Vałančus adznačyŭ, što takija vizity abjadnoŭvajuć žycharoŭ krainy.
«Jon abjadnoŭvaje i narod. Kab było stolki ludziej na padobnym mierapryjemstvie… Heta nie šerahovaja padzieja dla Litvy», — skazaŭ jon. Mužčyna taksama dadaŭ, što ŭvaha Śviatoha ajca da jaŭrejaŭ i achviar nacystaŭ śviedčyć pra toje, što ciažkaści historyi nie zabytyja.
Kamientary