Siońnia biełarusy ŭbačać samaje doŭhaje poŭnaje zaćmieńnie Miesiaca ŭ 21 stahodździ
Siońnia ŭviečary ŭsie žychary našaj krainy zmohuć nazirać nadzvyčaj doŭhaje poŭnaje zaćmieńnie Miesiaca. Naš spadarožnik schavajecca ŭ ziamny cień i projdzie amal praź jahony centr. Pry hetym jon budzie znachodzicca ŭ apahiei — na maksimalnaj adlehłaści ad Ziamli — i budzie mieć minimalnuju vuhłavuju chutkaść adnosna zorak. Usio heta pryviadzie da taho, što praciahłaść siońniašniaha zaćmieńnia budzie najbolšaj za ŭsio 21-je stahodździe: poŭnaja faza praciahniecca ažno 103 chviliny!
Paŭcieniavoje zaćmieńnie, słaba zaŭvažnaje dla niepadrychtavanych naziralnikaŭ, pačniecca jašče da ŭzychodu Miesiaca, a pahružacca ŭ cień Ziamli jon pačnie ŭ 21:24. U 22:30 naš spadarožnik całkam schavajecca ŭ cień i prabudzie tam da 00:13. Skončacca cieniavyja fazy ŭ 01:19 pa biełaruskim časie.
Mnohija ŚMI lubiać nazyvać takija źjavy «kryvavym Miesiacam». Sapraŭdy, padčas poŭnaj fazy naš spadarožnik nie źnikaje całkam ź nieba — jaho aśviatlajuć promni Sonca, małaja častka jakich pierałamlajecca ŭ ziamnoj atmaśfiery i ŭsio ž-taki dasiahaje miesiacovaj pavierchni. I pieraadolvajuć toŭšču ziamnoj atmaśfiery pieravažna čyrvonyja promni. Z-za hetaha Miesiac nabyvaje čyrvonuju, «kryvavuju» afarboŭku. Adnak z-za asablivaściaŭ našaha zroku (my drenna bačym kolery ŭ ciemry) dla čałavieka poŭnaje zaćmieńnie Miesiaca budzie mieć šery abo cahielna-karyčnievy koler, a čyrvonyja adcieńni budzie zdolnaja pieradać chiba tolki fotakamiera.
Adnak u hetuju noč niemahčyma budzie nie źviarnuć uvahu na inšaje niabiesnaje cieła čyrvanavataha koleru — Mars, jaki budzie źziać jarkaj zorkaj nizka na poŭdni. Mienavita 27 lipienia adbyvajecca tak zvanaje Vialikaje procistajańnie Marsa, kali jon nabliziŭsia da nas maksimalna blizka za apošnija 15 hod. Kali vy majecie teleskop, to skarystajciesia hetaj mahčymaściu kab ubačyć jak maha bolš detalaŭ na dysku Čyrvonaj płaniety. Ale i prosta panazirać za Marsam niaŭzbrojenym vokam budzie cikava — u nastupny raz nastolki jarkim jon budzie vielmi niaskora. Darečy, voś tak vyhladaŭ Mars paru dzion tamu ŭ Nalibockaj puščy:
Kamientary