«Maleńkaja čornaja sukienka» ad Guerlain i mašynki: piać lubimych rečaŭ śpiavački Paliny Respubliki
U novaj rubrycy «Piać rečaŭ» znajomim vas ź lubimymi, časam losavyznačalnymi rečami biełarusaŭ/k. Bieź ich jany słaba ŭjaŭlajuć svajo žyćcio, bo ź imi źviazanyja šmat važnych padziej i emocyj.
Siońnia pra toje, što dakładna budzie abo ŭ jaje torbie, abo ŭ kišeniach, raskazvaje śpiavačka Palina Respublika.
— Ja pracuju nad novym albomam, jaki mušu vydać vosieńniu. Praces idzie bolš pavolna, čym chaciełasia b, bo ja pastaviła zadaču zrabić usio sama: ad napisańnia muzyki da zapisu i źviadzieńnia. Ja chaču zrazumieć śpiecyfiku ŭsich etapaŭ, bo tolki tady pieśni stanoviacca niečym bolšym: heta ŭžo mastackija tvory pra toje, što ty dumaješ i adčuvaješ. Pieršy trek ad mianie novaj pad imiem Palina užo možna pasłuchać: ja pryśviaciła jaho Iosifu Brodskamu.
Kali razhladać pieryjady paśla naradžeńnia syna i da jaho, to žyćcio, viadoma, źmianiłasia. Ale nie tamu, što źjaviŭsia Ściapan. Prosta razam z hetym paralelna ŭ mianie skončyŭsia i peŭny pieryjad u tvorčaści. Akramia taho, ja atrymała dypłom. Karaciej, žyćcio stała inšym. Spačatku było ciažka, ale ŭ vyniku ja baču, što my sa Ściapanam adzin na adnaho dobra ŭpłyvajem. Jon dazvoliŭ zrabić moj rytm bolš arhaničnym.
Ja chaču praciahvać zajmacca muzykaj. Jak minimum, pasprabavać. Ale mnie cikavyja i inšyja tvorčyja štuki kštałtu videa ci hrafiki. Ja pieraklučajusia na ich, kali treba źmianić vid dziejnaści, i takim čynam z novych krynic čerpaju dadatkovuju enierhiju. Pa hrafiku z 9.00 da 18.00 siońnia ja nie zmahła b pracavać, heta dakładna: usio ž u mianie jość zareziervavany čas na siamju i na zaniatki muzykaj. Z pracaj u ofisie heta spałučyć ciažka.
Pachodnaja kłavijatura
Ja nabyła hetuju midzi-kłavijaturu vosieńniu, kali treba było jechać u Šviejcaryju. Ciahnuć tudy svoj tradycyjny 9-kiłahramovy instrumient było b vielmi niazručna.
Ciapier jana sa mnoj zaŭsiody, jak i komp: padklučaješsia — i možna pisać muzyku ŭ lubym miescy. Navat u łožku, kali pakłała małoha spać. Apošnim časam usia novaja muzyka naradžajecca mienavita na hetaj kłavijatury.
Lubimy pach
Duchi ad Guerlain «Maleńkaja čornaja sukienka» — apošni pach z tych, što mianie zachapiŭ. Jon višniovy. Cikava, što luboŭ ź im adbyłasia jašče hod piać tamu, i tolki hetaj zimoj duchi mnie padaryła siabroŭka.
Jany nie tannyja. Kłasu «Šanel». Ale moj syn pra heta dakładna nie viedaje: niadaŭna ja zastała jaho za tym, jak jon myŭ imi bałkonnyja dźviery.
Ja daŭno fanacieju ad pachaŭ. Pamiataju, raniej mahła pačuć niejki na vulicy, a paśla šukać jaho, kab nabyć.
Duchi zachoŭvajuć u sabie čas. Tamu ja nie karystajusia tymi, jakija byli ŭ mianie, naprykład, u 9-m kłasie. Jany pra toj čas. A siońnia — inšy.
Knižka-nastaŭnik
Heta vydańnie — pra historyju novaj muzyki praź imiony muzykaŭ. Teksty źmiaščajucca ŭ farmacie intervju.
Z dapamohaj hetaj knižki ja adkryła dla siabie šmat cikavych bijahrafij i vyniesła ź jaje dumki, što źmianili moj muzyčny śvietapohlad. Jana jak nastaŭnik, jakoha zaŭsiody možna zachapić z saboj.
Paśla kožnaj hutarki tut nadrukavanyja spasyłki na roznyja inšyja materyjały. I ja starajusia dadatkova huhlić pra nieviadomych mnie ludziej.
A kvietki, jakija ŭ joj schavanyja, heta tolki małaja častka z tych, što ja zasušyła. Ja nie stvaraju ikiebana. Prosta vykarystoŭvaju ich u mejkapie na kancertach. I hetych kvietak u mianie ŭžo nasušana stolki, što chapiła b na salidny čas dla štodzionnych vystupaŭ cełaha choru.
Kimano-transformier, dyvanok dla johi i inšyja lubimyja rečy Kaciaryny Sakovič
Cacačnyja mašynki
Mašynak u nas doma naźbirałasia kala sotni. I kudy b ja ni pajechała, jany amal zaŭsiody sa mnoj u kišeni: kab, kali budzie nieabchodnaść, syna možna było imi zaniać.
Ja ich pryvožu Ściapanu z hastrolaŭ sama, i radujusia bolš za jaho, kali niechta doryć nam — atrymlivaju ad ich estetyčnaje zadavalnieńnie. Akramia hetaha, moj baćka byŭ honščykam, zajmaŭsia aŭtamabilnym sportam, tamu mašynki ŭ niejkim sensie simvał jaho.
Lubimyja zavušnicy
Ja nie fanat upryhožańniaŭ i kaśmietyki. Mnie heta niecikava. Pašancavała, što siabroŭka moža na kancerty i mejkap zrabić, i niešta z zavušnic pazyčyć.
Tyja, što na mnie — adzinyja, što maju ciapier Ja pryviezła ich sa Lvova, dzie apošnija hady byvaju vielmi časta. Z kramy «Ŝoś Cikavie», što na płoščy Rynak. Heta ŭ centry i z adnaho boku tam turystyčny kałaps, ale mienavita ŭ dvoryku staroha doma, dzie pradajucca hetyja vyraby, vielmi spakojna. U Lvovie nas mnohija viedajuć, tamu kožny raz viartaješsia tudy jak dadomu.
Dziakujem kaviarni Stories za miesca, pradstaŭlenaje dla fotazdymak.
Ciapier čytajuć
Ci patrebnaja biełaruskaja mova tym, chto razmaŭlaje pa-rusku? Azaronak zadaŭsia takim pytańniem na STB, a vypusknik Akademii MUS prapanavaŭ zamianić uroki fakultatyvami4444
Kamientary