Na ekstranym pasiadžeńni Rady Biaśpieki AAN, sklikanym u suviazi ź mierkavanaj chimičnaj atakaj u pryharadzie Damaska, pradstaŭnica ZŠA Niki Chejli zajaviła, što Rasija vinavataja ŭ hibieli mirnych žycharoŭ u Siryi.
Pasiadžeńnie było sklikana pa inicyjatyvie dzieviaci členaŭ arhanizacyi — Vialikabrytanii, Francyi, ZŠA, Polščy, Niderłandaŭ, Šviecyi, Kuviejta, Pieru i Kot-dJIvuara.
Zachad abvinavačvaje režym siryjskaha prezidenta Bašara Asada va ŭžyvańni chimičnaj zbroi suprać mirnaha nasielnictva na terytoryi Dumy — adnaho z nasielenych punktaŭ Uschodniaj Huty ŭ pryharadzie Damaska.
Paviedamlałasia pra hibiel dziasiatkaŭ ludziej. Va ŭsich zahinułych byli simptomy, jakija pakazvali na prymianieńnie chimičnych atrutnych rečyvaŭ.
Rasija zajaviła, što dokazaŭ chimičnaj ataki niama. Ułady Siryi paličyli abvinavačvańni ŭ adras siryjskaj armii niepierakanaŭčymi.
Prezident ZŠA Donald Tramp zajaviŭ, što prymie rašeńnie pa siryjskim pytańni da 12 hadzin sierady pa časie Uschodniaha ŭźbiarežža.
Chejli padkreśliła: jana nie stavić pad sumnieŭ infarmacyju ab chimičnaj atacy ŭ Siryi. Jaje arhanizatara jana nazvała pačvaraj: «Złučanyja Štaty poŭnyja rašučaści zrabić tak, kab monstr, jaki užyŭ chimičnuju zbroju suprać siryjskich dziaciej, panios pakarańnie».
Dypłamat taksama adznačyła, što ŭžo kazała pra žachi chimičnych napadaŭ ŭ 2017 hodzie i, apisvajučy ŭ Radzie Biaśpieki AAN vyhlad miortvych siryjskich dziaciej, «maliłasia, kab heta nikoli nie daviałosia rabić iznoŭ».
Pavodle jaje słoŭ, niama sensu kazać pra heta znoŭ — paśla jaje letašniaha dakłada «nivodny ŭrad nie pavinien byŭ by mieć spravy ź Siryjaj». Chejli taksama zajaviła, što «ruki Rasii - ŭ kryvi siryjskich dziaciej, a iranskija siły robiać astatniuju brudnuju pracu».
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie5555
Kamientary