«Kali b usio navokał stała pravasłaŭnym, to Chrystos pakinuŭ by carkvu»: Fiodar Poŭny ŭpiknuŭ mitrapalita Paŭła? 

Niadaŭna pravasłaŭny mitrapalit Pavieł adznačyŭsia skandalnaj zajavaj, što ŭ «pravasłaŭnych i ŭnijataŭ rozny Boh».

Jon pramoviŭ heta ŭ chodzie abmierkavańnia situacyi ŭ vioscy Biarozaŭka Viciebskaj vobłaści, dzie pravasłaŭnyja vierniki vymušanyja chadzić u kaścioł, bo carkvy tam niama.

Pavialičyć

«Adzin budynak vykarystoŭvajuć i pravasłaŭnyja, i kataliki. Ale heta ni ŭ jakim razie nie źjaŭlajecca niejkaj unijaj. Zadača ŭnijataŭ — skazać, što ŭ nas adzin Boh. Vybačajcie, dyk u nas nie adzin Boh, siabry maje. U vas svoj Boh, bo vy pa-inšamu ŭ Boha vierycie. Vy pa-inšamu jaho vyznajacie. Boh sapraŭdy adzin, ale ŭ karparacyi svoj boh, u niejki siektanckaj arhanizacyi — svoj. Jany da našaha supolnaha Tvorcy i Hospada nijakaha dačynieńnia nie majuć. Hospad ža ŭ Jevanhielli kazaŭ: «U vas čerava — Boh, u vas mamona — Boh». U jazyčnikaŭ ža taksama idał — boh. Ale dla nas, pravasłaŭnych, heta cacanka. Hetak ža i ŭnijaty», — skazaŭ ijerarch i dadaŭ, što nie varta ŭmiešvacca ŭ žyćcio źmiašanych katalicka-pravasłaŭnych siemjaŭ, kali jany «žyvuć u miry i zhodzie» i pakul «nie saśpieli stać pravasłaŭnymi».

Takija słovy mitrapalita vyklikali reakcyju nie tolki ŭ hramadstvie, ale i siarod samoha klira — krynicy «Našaj Nivy» paviedamlajuć, što ŭ pryvatnych abmierkavańniach zajavy Paŭła aceńvajuć jak śviedčańnie «prafiesijnaj nieprydatnaści» aŭtara. 

Admietna, što i ŭpłyvovy śviatar Fiodar Poŭny, jaki štoniadzielu čytaje propaviedź u efiry kanała ANT, taksama zhadaŭ hetuju historyju — praŭda, vykazaŭsia jon inšaskazalna, ale paraleli davoli jasnyja. 

Pavialičyć

«Kali b ja byŭ djabłam, ja b dapamoh pravasłaŭju atrymać pieramohu na ŭsich frantach, kab usie i ŭsia navokał stali pravasłaŭnymi: pravasłaŭnaje zakanadaŭstva, pravasłaŭnaje vojska, škoły, balnicy, kłuby, spartovyja siekcyi. Dziciačy sad imia Sierhija Radaniežskaha, teatr imia Iaana Kranštadskaha, vulicy b zapoŭnili biłbordy z cytatami śviatych, u kampjutarach zapracavała b sistema «Artadaksija», pa subotach i niadzielach dzieciam by tolki posnuju ježu davali… — cytuje Poŭny niekaha sa svaich znajomych. — I tady, niezaŭvažna, carkva stanie mirskoj ustanovaj. Stanie, jak partyja ŭ SSSR — spračacca nie buduć, ale i nie palubiać, na kuchniach buduć raskazvać aniekdoty pra archijerejaŭ. I ŭ adzin dzień vyśvietlicca, što carkvy niama, zastalisia tolki formy, Chrystos syšoŭ».

«Forma, jakaja straciła źmiest, nikomu nie treba», — reziumavaŭ jon. 

Taksama Poŭny akcentavaŭ uvahu na tym, što «siońnia mnohija ščyryja vierniki biahuć z carkoŭnych arhanizacyj, kab nie zhubić vieru».

Čytajcie taksama:

Anatol Sidarevič: Paśla Fiłareta Pavieł vyhladaje jak niedavučany sieminaryst

***

Na telehram-kanał «Našaj Nivy» možna padpisacca tut.

• 0
• 0
• 0
• 0
• 0
• 0
• 0
• 0