Ad viečara 24 studzienia ŭ Biełarusi rašeńniem Ministerstva infarmacyi abmiežavany dostup da partała «Chartyja-97». Žurnalisty pratestujuć, Rasija pradkazalna pramaŭčała, ale anałahična paviali siabie i krainy Zachadu.
Rašeńnie było patłumačana artykułam 38 zakona «Ab srodkach masavaj infarmacyi». Jakija varyjanty zabaronienaj infarmacyi jon praduhledžvaje? Pretenzii ministerstva mahli ŭźniknuć da infarmacyi ab dziejnaści niezarehistravanych arhanizacyj, prapahandy narkotykaŭ, ekstremisckaj infarmacyi, parnahrafii, ci infarmacyi, jakaja moža nanieści škodu nacyjanalnym intaresam Biełarusi.
Hałoŭnaja redaktarka «Chartyi» Natalla Radzina i adzin z zasnavalnikaŭ partała palityk Andrej Sańnikaŭ nazyvajuć błakavańnie ŭdaram pa svabodzie słova. U šmatlikich intervju dla zamiežnych ŚMI jany havaryli, što buduć zaklikać da ŭviadzieńnia suprać Biełarusi sankcyj. Adnak pakul što reakcyja mižnarodnaj supolnaści na błakavańnie «Chartyi-97» dastatkova strymanaja.
Pres-sakratar kiraŭnika MZS Litvy Rasa Jakiłajcienie skazała: «Heta nie pieršy raz i nie pieršy partał, jaki błakujecca. Heta nie ździŭlaje, adnak chvaluje. Svaboda słova źjaŭlajecca adnoj z asnoŭnych demakratyčnych svabod; jana ŭmacoŭvaje, a nie asłablaje dziaržavu i hramadstva».
Vice-prezident Jeŭrapiejskaj narodnaj partyi Paŭłu Ranžeł paśla naviedvańnia Minska skazaŭ: «Ja škaduju ab tym, što situacyja ŭ dačynieńni da rehistracyi palityčnych partyj i hramadskich arhanizacyj nie palepšyłasia, što asabliva tyčycca BCHD. Ja taksama vielmi zaniepakojeny ciskam na niezaležnyja srodki masavaj infarmacyi, u pryvatnaści, na navinavy sajt «Chartyja-97».
Šmat uvahi temie «Chartyi» addajuć pravaabaroncy. Z admysłovymi zajavami vystupili pravaabaroncy-viasnoŭcy, «Reparciory bieź miežaŭ».
Pradstaŭnik ABSIE ŭ pytańniach svabody ŚMI Harlem Dezir taksama nie pakinuŭ temu biez uvahi: «Paŭtornaje błakavańnie dostupu da sajtaŭ u Biełarusi za apošnija niekalki miesiacaŭ vyklikaje tryvohu. Takija dziejańni nanosiać škodu ažyćciaŭleńniu asnoŭnych pravoŭ čałavieka na atrymańnie i raspaŭsiud infarmacyi, a taksama na svabodu ŚMI».
Varta adznačyć, što pra błakavańnie papularnaha sajta pišuć viadučyja suśvietnyja ŚMI, jak Washington Post, New York Times, Associated Press, CNN, BBC, Libération, France Press. Infarmacyja źjaŭlałasia navat u takich ekzatyčnych krainach, jak Małajzija.
30 studzienia Minsk naviedvaŭ jeŭrakamisar pa pytańniach pašyreńnia i dobrasusiedstva Jochanes Chan. Prynamsi publična temu błakavańnia «Chartyi» jon nie ŭzdymaŭ.
Nie było pakul nijakich zajaŭ ab situacyi ad pradstaŭnikoŭ Polščy, Hiermanii, Vialikabrytanii i inšych krain.
Pra mižnarodnuju reakcyju na zakryćcio papularnaha sajta my parazmaŭlali z palityčnym analitykam Alaksandram Kłaskoŭskim.
«Bačna, što sami ludzi, datyčnyja da «Chartyi», sprabujuć pryciahnuć uvahu mižnarodnaj supolnaści. Čuvać hučnyja zajavy ad Natalli Radzinaj, Andreja Sańnikava. Dla ich heta zvykłyja apielacyi.
Ale možna skazać, što Jeŭropa stała inšaj u svaich padychodach da biełaruskaha režymu. My bačym vizit Jochanesa Chana, jaki sustrakaŭsia z apazicyjaj, padymaŭ pytańni pravoŭ čałavieka na sustrečy z Łukašenkam. Tym nie mienš, tanalnaść Jeŭropy strymanaja. Vybranaja bolej prahmatyčnaja linija ŭ dačynieńniach ź biełaruskim kiraŭnictvam. Toj ža Chan kazaŭ, što Jeŭropie važnaja stabilnaść u rehijonie. Na hetaj hlebie Brusel i Minsk znachodziać supolnuju movu.
Ja nie vyklučaju, što asobnyja jeŭrapiejskija palityki buduć artykulavać hetuju prablemu. Naturalna, pravaabaroncy buduć, bo niadobra ŭ Jeŭropie błakavać internet.
Siońnia nie taja situacyja, kab u Jeŭropie na surjoznym uzroŭni zadumalisia pra viartańnie sankcyj praź incydent z «Chartyjaj». Niebiaśpiečnaja sama tendencyja. Dumaju, akuratna ŭ kułuarach tyja ž jeŭrapiejskija palityki ŭsio ž buduć prahavorvać temu, kab biełaruskija ŭłady nie pierahinali pałku. I peŭnaje ŭździejańnie heta moža mieć efiekt. U biełaruskich uładnych kołach taksama razumiejuć, što błakavańnie nie duža efiektyŭnaje, jość šmat šlachoŭ jaje abychodžańnia. Našto ŭładzie stračvać niejkija punkty parazumieńnia ŭ adnosinach z Zachadam? Ciaham minułaha hoda my bačyli, što ŭ peŭnych pytańniach ułady adkručvali nazad, jak było z «Biełym lehijonam». Nie vyklučaju, što mohuć zadumacca i nie praciahvać hetuju kiepskuju tendencyju.
Što tyčycca ZŠA, to jany myślać hłabalnymi katehoryjami. Amieryka maje siońnia dastatkova prahmatyčnuju administracyju, Tramp nie vyhladaje na adepta prasoŭvańnia demakratyi i pravoŭ čałavieka. U ZŠA niama iluzij adnosna biełaruskaha režymu, ale im vyhadna narmalizavać adnosiny ź Minskam, kab Biełaruś nie była 100%-m satelitam Maskvy. Kali ŭličvać maštab takoha supraćstajańnia, to błakavańnie adnaho asobnaha sajta ŭ Vašynhtonie nielha razhledzieć navat pad mikraskopam», — ličyć Alaksandr Kłaskoŭski.
Ciapier čytajuć
Historyja 12‑hadovaj Viery ŭ minskaj infiekcyjnaj balnicy nastolki ŭraziła biełarusaŭ, što ciapier čarha z achvotnych dapamahčy6
Kamientary