Alaksandr Łukašenka voźmie ŭdzieł u aktyŭnaj fazie sumiesnych vučeńniaŭ «Zachad-2017». Pra heta paviedamiła BiełTA pres-sakratar kiraŭnika dziaržavy Natalla Ejsmant.
Pavodle jaje słoŭ, Łukašenka aznajomicca z chodam vučeńniaŭ na terytoryi Biełarusi. «Pakul rana kazać pra kankretnuju datu i miescy naviedvańnia. Hetaja infarmacyja budzie ahučana paźniej», — skazała pres-sakratar.
Natalla Ejsmant prakamientavała infarmacyju, jakaja źjaviłasia ŭ ŚMI, ab tym, što pieršapačatkova čakałasia prysutnaść kiraŭnika Biełarusi ŭ miescach praviadzieńnia vučeńniaŭ na terytoryi Rasii, ale ciapier hetyja płany źmianilisia.
«My nie razhladajem hetaje pytańnie mienavita ŭ takim rakursie. Viadoma, napiaredadni vučeńniaŭ baki viali kansultacyi pa roznych kanałach, uzhadniali ich padrychtoŭku, u tym liku razhladalisia varyjanty ŭdziełu ŭ hetych mierapryjemstvach na ŭzroŭni kiraŭnikoŭ dziaržaŭ. Adnak pieršapačatkova płanavałasia, što Alaksandr Łukašenka voźmie ŭdzieł u vučeńni mienavita na terytoryi Biełarusi. Ułasna, i aficyjnaha zaprašeńnia kiraŭniku biełaruskaj dziaržavy pryjechać na hetyja vučeńni ŭ Rasiju nie pastupiła», — adznačyła pres-sakratar.
Jana patłumačyła, što takoje rašeńnie abumoŭlena pierš za ŭsio tym, što ŭ hetym hodzie asnoŭnaja arena dziejańniaŭ u chodzie vučeńnia, jakaja ŭklučaje vosiem palihonaŭ i učastkaŭ miascovaści, znachodzicca na terytoryi Biełarusi, mienavita tut zadziejničany asnoŭnyja siły i srodki, u tym liku rasijski składnik.
«Jak viadoma, padobnyja maštabnyja biełaruska-rasijskija vučeńni pravodziacca raz u dva hady pa čarzie na terytoryi kožnaj z krain. U hety raz u centry padziej mienavita terytoryja Biełarusi, a ŭsie astatnija epizody vučeńniaŭ nosiać druharadny charaktar. Tamu naturalna, što mienavita ŭ našaj krainie čakaŭsia i ŭdzieł dvuch prezidentaŭ. Darečy, u adras prezidenta Rasii Uładzimira Pucina było nakiravana zaprašeńnie, ale na dadzieny momant aficyjnaha adkazu na hety kont nie pastupała. Čakajem», — zajaviła Natalla Ejsmant.
Pres-sakratar dadała, što, pavodle najaŭnaj nieaficyjnaj infarmacyi, rasijski bok prapracoŭvaje inšy farmat udziełu prezidenta Rasii ŭ vučeńniach «Zachad-2017».
Natalla Ejsmant padkreśliła, što niezaležna ad farmatu ŭdziełu rasijskaha boku Alaksandr Łukašenka adnaznačna budzie prysutničać na vučeńniach u Biełarusi ŭ adzin z majučych adbycca dzion. «Zajavy ŭ ŚMI, pra jakija vy kažacie, my razhladajem vyklučna jak insinuacyi, i nam pakul nie zrazumieła, z čym jany źviazany», - reziumavała pres-sakratar.
Ciapier čytajuć
Anžaliku Mielnikavu bačyli ŭ Minsku ŭ «Dana Mole»29
Kamientary