Leta — nie najlepšy čas dla sieryjalnych navinak, ale niešta cikavaje źjaŭlajecca i ŭ hetyja śpiakotnyja miesiacy hoda. «Naša Niva» prapanuje tradycyjny ahlad samych cikavych sieryjałaŭ apošniaha času.
«Tvin Piks» (Twin Peaks)
Drama, detektyŭ, žachi. ZŠA, 3-i siezon
Rejtynh na IMDB: 8,7
Złaviesny saŭndtrek da hetaha sieryjała kamuści pomnicca ź dziacinstva, kamuści — ź junactva. Nieabyjakavym jon nie pakidaŭ nikoha. Hety film daŭno ličycca adnym z najlepšych u historyi telebačańnia. Hłuchi haradok Tvin Piks u štacie Vašynhton schavany ad śvietu pichtami Duhłasa, tut hatujuć samy smačny va ŭsioj Amierycy višniovy piroh, a taksama raźlivajuć całkam prystojnuju kavu.
Adnak niečakana ŭ adzin momant uvieś horad pačynaje zadavacca amal sakralnym pytańniem: «Chto zabiŭ Łoru Pałmier?» Staršakłaśnicu miascovaj škoły znachodziać pamierłaj i zhvałtavanaj. I dziŭnym čynam akazvajecca, što mahčymych padazravanych našmat bolej, čym možna sabie padumać.
Vydatny režysior i scenaryst Devid Linč zdolny trymać intryhu ad pačatku i da kanca, jon viedaje tyja patajemnyja kručki, jakija nie dazvalajuć spažyŭcu syści ad prahladu. Ciapier Linč pastaviŭ pierad saboj nie mienš składanuju zadaču: adradzić «Tvin Piks» paśla 26-hadovaha pierapynku.
Pra novy siezon kultavaha sieryjału možna pačuć šmat admoŭnaha. Maŭlaŭ, nie ŭsio jasna, dziejańni marudnyja. Adnak stabilna vysoki rejtynh «Tvin Piksa» śviedčyć pra toje, što Linču znoŭ atrymałasia stvaryć niešta blizkaje da šedeŭra.
«Ozark» (Ozark)
Kryminalnaja drama, tryler. ZŠA, 1-y siezon
Rejtynh na IMDB: 8,6
Finansavy kansultant Marci Biord, u jakoha «dastatkova sumnaje žyćcio», zahraznuŭ u pazykach. Jon nie znachodzić lepšaha vyjścia, jak uciakać z Čykaha ŭ maleńki haradok Ozark, štat Misury, kab uratavać svajo žyćcio, a taksama žyćcio svajoj siamji.
U sieryjale možna znajści dastatkova kłasičny kaktejl dla kryminalnaj dramy: mieksikanskija narkahandlary, hrošy, prastytutki, pistalety. Amierykanskija kinakrytyki kažuć, što «Ozark» pakul nie dasiahnuŭ uzroŭniu kłasičnych filmaŭ hetkaha žanru, ale biezumoŭny patencyjał majecca.
Plus «Ozarka» — u daskanałych dekaracyjach, pradumanych dyjałohach hałoŭnych hierojaŭ, u jaho psichałahiźmie. Marci sprabuje razrulić prablemy nie tolki z narkakartelem, ale z ułasnaj siamjoj, a hetaja linija navat nie mienš cikavaja.
«Vośmaje pačućcio» (Sense8)
Fantastyka, drama. ZŠA, 2-i siezon
Rejtynh na IMDB: 8,4
Što ahulnaha ŭ mieksikanskaha akciora-hieja Lita Radryhiesa, sieulskaj biznes-łedzi Sun Pak, niamieckaha złodzieja Volfhanha Bahdanava i čykahskaha palicejskaha Uiła Horski? Usie jany nieznajomyja pamiž saboj, ale niečakana nabyvajuć mientalnuju i emacyjnuju suviazi adno z adnym.
Tak isłandskaja dy-džejka Rajli Blu takim čynam moža akazacca źnianacku ŭ Najrobi ci Paŭdniovaj Karei. Pačuć i zrazumieć čałavieka zusim inšaj kultury. Ich vaśmiora, i jany abjadnanyja hetaj psichičnaj suviaźziu.
Kožnaja ź sieryj pryśviečanaja kamuści adnamu z hierojaŭ, padrabiaznaj jahonaj historyi, ale adnačasova raźvivajucca i historyi inšych piersanažaŭ.
Režysiory filma stavili sabie za metu stvaryć niešta absalutna novaje ŭ śviecie sieryjałaŭ. Film zdymaŭsia adnačasova ŭ vaśmi krainach. Z druhoha siezona «Vośmaje pačućcio» addaje bolš uvahi temam palityčnych pohladaŭ, seksualnaści, relihii.
Varta taksama adznačyć, što hety film atrymlivaŭ premiju ad Amierykanskaha aljansa hiejaŭ i leśbijanak za karektnaje aśviatleńnie hetaj temy.
«Amierykanskija bahi» (American Gods)
Fentezi, drama. ZŠA, 1-y siezon
Rejtynh na IMDB: 8,2
Ludzi naradžajucca, žyvuć, a potym pamirajuć. Što, kali hetki samy šlach majuć nie tolki jany, ale i bahi? Amierykanski piśmieńnik Nił Hiejman ličyć, što bahi takija samyja śmiarotnyja, jak i ludzi. Jany nie žyvuć viečna, nie ŭvieś čas pirujuć u svajoj Valchale. Baham taksama treba zarablać na žyćcio.
Bahi minułaha daŭno zabytyja, jany pierabivajucca abjedkami, jakija pakidajuć im bahi internetu, telebačańnia, chutkasnych šase i hipiermarkietaŭ. Kaliści hetych bahoŭ pryvozili ŭ ZŠA z usiaho śvietu: Skandynavii, Biełarusi, Jehiptu, Irłandyi, Japonii i h.d. Praŭda, čym bolej času prachodziła, tym mieniej pra ich zhadvali.
Mister Sierada (nie ličycie heta spojleram, jon ža Odzin) źbiraje starych bahoŭ na apošni kryvavy boj z bahami sučasnaści. Dapamahčy jamu ŭ hetym musić Cień Mun, były źniavoleny. Voś tut i pačynajucca vandroŭki Odzina i Cienia pa ŭsioj Amierycy.
«Amierykanskija bahi» — heta postmadernizm, intelektualistyka, schavanaja pad płastam papsy. Nie samy prosty sieryjał sučasnaści, adnak zdolny prynieści šmat razumovaha zadavalnieńnia ad prahladu.
«Aranžavy — chit siezonu» (Orange Is the New Black)
Kamiedyja, drama. ZŠA, 5-y siezon
Rejtynh na IMDB: 8,2
Turma — heta adna sa śfieraŭ žyćcia, kudy chočacca zazirnuć mnohim, ale nie na ŭłasnym dośviedzie. Vakoł turemnych źniavoleńniaŭ isnuje mnostva mifaŭ i zabłudžeńniaŭ. Jakija ž tam nasamreč paradki, chto zdolny vyžyć na hetaj terytoryi, a chto nie? I aktualna heta nie tolki dla nas, ale i dla ZŠA. Niekali film «Ucioki z Šaŭšenka» pavodle tvora Styviena Kinha staŭ ledź nie kłasičnym.
«Aranžavy» ž prapanuje zazirnuć za šyrmu žanočaj kałonii. Maładaja dziaŭčyna Pejpier Čapmen apynułasia na 15 miesiacaŭ u turmie za saŭdzielnictva svajoj kachanaj Aleks Voŭz u pravozcy narkotykaŭ. Čapmen — z dastatkova bahataj ńju-jorkskaj siamji. Źniavoleńnie dla jaje — realny šok. Jana nie viedaje, što rabić i čaho nie rabić za kratami.
Turma — heta ceły śviet sa svaimi admietnymi piersanažami. Naprykład, ruskaja kucharka Halina Reźnikava, jana ž Red. Usiemahutnaja ŭ pačatku sieryjała, jana sprabuje pryvučyć naravistuju Čapmen, što jaje i jaje kuchniu krytykavać nielha. U adnoj ź sieryj na ścianie la łožka «Red» visić vympieł biełaruskaha KDB. Jość łacinaamierykanki z samaha dna amierykanskaha žyćcia, relihijnyja fanatki i navat sapraŭdnaja manaška, transhiendar-cyrulnica i šmat chto jašče. Ničyja historyja nie padobnaja da inšaj. Jak vyžyć i zastacca čałaviekam u hetaj zakrytaj prastory?
«Prapaviednik» (Preacher)
Čorny humar, drama. ZŠA, 2-i siezon
Rejtynh na IMDB: 8,1
Džesi Kaster — heta nie samy typovy amierykanski pastar. U jaho daŭni kryzis viery, nie pakidajuć sumnivy, ci jość Boh. Jon by daŭno kinuŭ svaju pracu, kali b nie abiacańnie baćku pierad śmierciu apošniaha. Niadzielnyja pramovy Kastera ciažka nazvać natchnialnymi. Prapaviedniku bolš padabajecca žłukcić viski i burbon, a taksama kuryć cyhary. Džesi niečakana pačynaje siabroŭstva z sapraŭdnym vampiram.
I hetki dekadans praciahvajecca da toj pary, pakul u jaho nie ŭsialajecca tak zvany Hieniezis, płod kachańnia anioła i demana. Ludzi z taho śvietu sprabujuć zabrać Hieniezisa nazad, ale ŭsie ich sproby zastajucca marnymi. U adzin ź dzion prapaviednik abiacaje pryvieści ŭ carkvu sapraŭdnaha Boha…
Sieryjał źniaty pa matyvach papularnaha ŭ ZŠA komiksa. Stvaralniki filma imknucca pieradać u kino mienavita atmaśfieru komiksaŭ. Zdajecca, u ich heta niakiepska vychodzić.
«El-Čapa» (El Chapo)
Kryminalny tryler, bijahrafija
Rejtynh na IMDB: 7,9
Słava sieryjała «Narka» pra žyćcio znakamitaha kałumbijskaha narkabarona Pabła Eskabara nie daje spakoju i inšym stvaralnikam sieryjałaŭ. «El-Čapa» — heta bajopik Chaakina Huzmana, «Karatyški», nie mienš viadomaha handlara narkotykami ź Mieksiki. Pavodle roznych acenak, El-Čapa navat pieraŭzyšoŭ u bahaćci Eskabara.
U «El-Čapa» dla hledačoŭ zabiaśpiečany ekšn ad pieršaj sieryi. Jak i ŭ «Narka», u filmie vydatnyja saŭndtreki na ispanskaj movie. Hałoŭnyja roli vykonvajuć taksama ispanamoŭnyja artysty. Asobna varta adznačyć toje, što Huzman usio jašče zastajecca žyvym. Jon čas ad času navat uciakaje ź mieksikanskich turmaŭ. Cikava, ci atrymałasia jamu samomu ŭžo pahladzieć sieryjał pra siabie?
Hladzi taksama:
Siem najlepšych sieryjałaŭ hetaj vosieni
Siem najlepšych sieryjałaŭ hetaj zimy
Siem najlepšych sieryjałaŭ hetaj viasny
Ciapier čytajuć
Biełaruskaja i rasijskaja armii na biełaruskaj terytoryi trenirujucca nanosić jadzierny ŭdar2
Kamientary