U sakaviku 2017 hoda maładaja žančyna ź Siryi była dastaŭlenaja ŭ balnicu ŭ Talinie z apiokami 70% pavierchni cieła. Jana praviała dva miesiacy ŭ komie, ale daktaram udałosia vyratavać jaje žyćcio. Na hetym tydni žančyna, jakaja razam ź siamjoj apynułasia ŭ Estonii ŭ ramkach prahramy pa pieramiaščeńni biežancaŭ, vychodzić z balnicy. Rus.Delfi.ee pa materyjałach haziety Eesti Ekspress raspaviadaje jaje trahičnuju historyju.
Dvaccacihadovy baćka Kovan, maci Alma i ich dačka Samar (imiony maci i dački źmienieny), prylacieli ŭ Talin ŭ lipieni 2016 hoda. Zhodna z raskazanaj imi historyjaj, kab patrapić ź Siryi ŭ Jeŭropu, siamja spačatku biehła na koniach u Irak, a adtul pierapraviłasia na łodcy ŭ Turcyju.
Zhodna z apoviedami prystaŭlenaha da siamji mientara, jaki pavinien byŭ dapamahać siryjcam asvoicca ŭ Estonii, novy ład žyćcia istotna źmianiŭ adnosiny pamiž mužam i žonkaj. Jak adznačajecca, paśla vypadku z pachodam u kramu, dzie inšyja pakupniki stali pilna jaje razhladać z-za pakrytaj chustkaj hałavy, žančyna pierastała nasić hety ŭschodni ŭbor. Alma ŭciakła adtul u ślazach i zatym patłumačyła mientaru, što bolš nie choča pryciahvać da siabie takoj uvahi.
Jašče adnym kulturnym šokam dla siamji, dzie pa ŭschodnich tradycyjach viaršenstvuje muž, staŭ toj fakt, što Alma dobra razumieła pa-anhlijsku, a jaje muž, naadvarot, navat nie viedaŭ łacinki. U vyniku jon staŭ zaležnym ad Almy, jakaja akazałasia dla jaho pasiarednikam u vyrašeńni ŭsich paŭsiadzionnych zadač u Estonii.
«Heta byŭ udar, bo ŭ siamji Machamadaŭ usie rašeńni zaŭsiody prymaŭ Kovan, ale tut jon staŭ jak byccam niezaŭvažnym», — piša vydańnie. Paciarpiełaja paprasiła mientara nie raspaviadać presie pra jaje adnosiny z mužam, adnak adkaznaja asoba zrabiła namiok na toje, što jany byli napružanymi, a Kovan nie byŭ kłapatlivym baćkam siamiejstva.
Nie chacieli pracavać za 400 jeŭra
Maładyja ludzi pastajanna skardzilisia na niedachop hrošaj: dziaržava apłačvała im kvateru, ale zvyš za heta na traich naležała 383 jeŭra ŭ miesiac. Pry hetym Kovan i Alma byli nie zhodnyja iści na pracu, kab atrymlivać tyja ž hrošy, jakija im vypłačvajuć u vyhladzie dapamohi. Naprykład, žančynie prapanoŭvali pracavać pasudamyjkaj za 400 jeŭra, ale jana admoviłasia.
Siryjcy kazali mientaru, što iduć na pracu, ale potym admaŭlalisia, potym zhadžalisia na inšuju pracu i znoŭ admaŭlalisia. To źbiralisia ŭ Hiermaniju, to płanavali viarnucca ŭ Irak, ale ŭ vyniku vyrašyli zastacca ŭ Estonii.
«Było tak šmat kidańniaŭ, što ja adčuła, što tak bolš nie mahu. Mahčyma, mnie trapiłasia siamja, jakoj treba bolš, čym inšym uciekačam», — uspaminaje mientar.
U sakaviku kuratar siamji apošni raz była ŭ haściach u siryjcaŭ. Zatym praź niekalki dzion Alma trapiła ź ciažkimi apiokami ŭ balnicu. Kali muž na nastupny dzień paśla zdareńnia pryjšoŭ u balnicu, jaho aryštavali palicyjanty. Siryjca abvinavačvajuć u naniasieńni ciažkich cialesnych paškodžańniaŭ. U vypadku pryznańnia jaho vinavatym Kovanu pahražaje turemnaje źniavoleńnie na termin ad 4 da 12 hadoŭ.
«Niaščasny vypadak vyklučany, — zapeŭniŭ kirujučy śledstvam staršy prakuror Saskija Kaśk. — Dakładna možna skazać tolki toje, što hareŭ bienzin, jaki pradajecca ŭ budaŭničych kramach».
Paškodžańni byli vielmi mocnyja — ahniom było paškodžana 70% pavierchni cieła maładoj žančyny. Almu trymali 2 miesiacy ŭ štučnaj komie, a nadzieja na toje, što jana vyžyvie, była słabaj.
U Siryi žonki pra takoje maŭčać
Siryjka, jaka žyvie ŭ Estonii, paprasiła jaje imia nie nazyvać, ale raspaviała, što dla Siryi typovyja vypadki, kali žonka moža nie davać pakazańni suprać muža, bajučysia taho, što toj paźniej adpomścić. U takim vypadku pakarańniem źjaŭlajecca tolki 1 hod pazbaŭleńnia voli.
«Zdarajecca, što žonka naohuł muža nie vydaje i fakt padpału zastajecca unutrysiamiejnaj spravaj», — adznačaje jana.
Žančyna ździŭlajecca, što ŭ Estonii było ŭžo dva takija vypadki — praŭda, u pieršym vypadku sprava abmiežavałasia pahrozami. Na jaje dumku, tak atrymlivajecca z-za taho, što siemji žonak daloka i nie mohuć pryjści na dapamohu, i ŭ mužčyn mienš pryčyn bajacca nastupstvaŭ.
Pieršy vypadak, pra jaki kaža sirijka — sproba padpału žonki «pa-ŭschodniamu», jakaja adbyłasia ŭ listapadzie minułaha hoda. Uradženiec Siryi Samier Chtab pasvaryŭsia z žonkaj (pavodle danych ŚMI, pryčynaj kanfliktu była reŭnaść). U chodzie kanfliktu mužčyna klejkaj stužkaj źviazaŭ žančynie ruki i prymianiŭ da jaje hvałt. Chtab abliŭ jaje haručaj vadkaściu i pahražaŭ padpalić jaje. Žančyna paviedamiła pra zdareńnie pradstaŭnikam estonskaj ułady, jakija źviarnulisia ŭ palicyju.
Kamientary