19-hadovaha minčanina, jakoha 27 traŭnia žorstka zatrymali na stancyi mietro «Kastryčnickaja» ŭ stalicy, adpuścili dadomu, niahledziačy na toje, što suprać jaho raspačataja kryminalnaja sprava pavodle artykuła 364 «Hvałt albo pahroza ŭžyvańnia hvałtu ŭ dačynieńni da supracoŭnika orhanaŭ unutranych spraŭ». Jak paviedamiŭ Jeŭraradyjo aficyjny pradstaŭnik Śledčaha kamiteta Siarhiej Kabakovič, u dačynieńni da zatrymanaha prymianili «miery pracesualnaha prymusu».
«Z ulikam pryznańnia svajoj viny i raskajańnia ŭ zroblenym, da jaho prymianili mieru prymusu: kab jon źjaŭlaŭsia pa pieršym vykliku, jak tolki spatrebicca śledčym».
Pavodle słoŭ pradstaŭnika Śledčaha kamiteta, adpuścili zatrymanaha prosta ź lakarni chutkaj dapamohi, dzie jon prachodziŭ taksikałahičnuju ekśpiertyzu i dzie chłopca vyvodzili sa stanu ałkaholnaha atručeńnia. Kolki dakładna pramile ałkaholu vyjavili miedyki ŭ kryvi 19-hadovaha chłopca, Kabakovič nie ŭdakładniaje.
Pavodle artykuła, jamu pahražaje da šaści hadoŭ pazbaŭleńnia voli. U Śledčym kamitecie źviartajuć uvahu na toje, što abvinavačany nidzie nie pracuje i nie vučycca, a na momant zdareńnia jon adpracoŭvaŭ 240 hadzin hramadskich rabot, pavodle prysudu ad lutaha 2017 hoda.
Nahadajem, zdareńnie adbyłosia 27 traŭnia ŭ 1 hadzinu 16 chvilin u staličnym mietro. Pa viersii HUUS, milicyjant spyniŭ junaka i paprasiŭ pakinuć mietrapaliten, bo pjanym zabaronieny prajezd u padziemcy. Jany padnialisia ŭ viestybiul, adnak sychodzić sa stancyi chłopiec admoviŭsia.
Paviedamlajecca, što junak staŭ supraciŭlacca, kali jaho sprabavali advieści ŭ pakoj milicyi dla razboru. Pry hetym jon traŭmavaŭ milicyjanta - zakryty pierałom kostak nosa. Pravaparušalnika zatrymali z udziełam supracoŭnikaŭ słužby biaśpieki minskaha mietrapalitena i bližejšaha milicejskaha naradu. Videa zatrymańnia trapiła ŭ sacsietki i vyklikała šmat pytańniaŭ da prafiesijanalizmu «ludziej u formie».
Kamientary