«Nie spynimsia, pakul nie pamrom» — u Barysavie piensijaniery trymajuć haładoŭku, bo nie majuć 800 rubloŭ spłacić kredyt
Pryčyny takoha ŭčynku — adsutnaść hrošaj, pracy i kryŭda na miascovyja ŭłady.
59-hadovaja Natalla i 62-hadovy Uładzimir Dakuki doŭhi čas žyli ŭ domie, padzielenym na dźvie siamji. Ich častka nievialikaja, pryčym tam žyło adrazu vaśmiora: Natalla z mužam, ich syn z žonkaj i dziciom, ich dačka z małym dziciom. Plus darosłaja unučka — jaje maci, dačka Natalli i Uładzimira, zahinuła, kali dziaŭčynie byŭ hod.
Žyli niaprosta, ale ŭ 2012 hodzie susiedzi pradavali svaju pałovu doma za $10 tysiač. Dakuki vyrašyli ŭziać kredyt i vykupić jaje.
U banku ŭziali 12 miljonaŭ rubloŭ — heta $1500 pa tahačasnym kursie.
«My ž pracavali, kantrakty byli praciahnutyja, byli ŭpeŭnienyja, što ŭsio spłacim, paśla i piečku pastavim…», — kaža Natalla.
Jana była sacrabotnikam, pracavała ŭ adździele nadomnaha absłuhoŭvańnia nasielnictva. Muž pracavaŭ kiroŭcam. Kali nadyšła piensijnaja para, Dakuki praciahnuli pracu.
«Zarablali miljonaŭ pa piać, plus piensija… Mahli płacić kredyt i zajmacca domam», — kažuć jany.
Dom pacichu pryvodzili ŭ paradak, ale nie paśpieli pastavić piečku.
A paśla pačalisia prablemy. U 2015 hodzie Natallu zvolnili.
«Mnie 26 listapada praciahnuli kantrakt, a praź miesiac — zvolnili», — kaža žančyna.
Sama jana śćviardžaje, što jaje «padstavili», bo jana nie chacieła zvalniacca dobraachvotna. U vyniku Natallu vykinuli z pracy pa artykule, bo jana «straciła davier kiraŭnictva». Paśla zvolnili i muža, skazali, što piensijaniery nie patrebnyja.
«Kali sieli čysta na piensiju, muž atrymlivaŭ 270 rubloŭ piensii, ja — 180. 210 rubloŭ byŭ kredyt. Plus apłačvali vučobu ŭnučki va ŭniviersitecie…», — kaža Natalla.
Hrošaj stała nie chapać. Dakuki ŭžo nie mahli płacić za kredyt. Sprava pajšła ŭ sud, u vyniku i Natallu, i muža abaviazali addavać na pahašeńnie kredyta pa 20% piensii.
Pa stanie na ciapierašni momant treba spłacić 800 rubloŭ (za praterminoŭku naličvajecca pienia).
«Dzieci dapamahčy nie mohuć. Dačka ŭ dekrecie, a syn zarablaje niedzie 2 miljony. My družnaja siamja, nichto nie pje, dapamahajem adno adnamu, ale hrošaj chapaje tolki na ježu. Adkłaści nie možam ani kapiejčyny», — skardzicca Natalla.
Kab nie ciaśnicca z małymi ŭnukami, Natalla i Uładzimir pierajechali ŭ letniuju kuchniu pobač z domam. Ale ž zimoj i jaje, i chatu daviałosia hreć maślanymi abahravalnikami, piečki ž nie było.
U vyniku za zimu elektryčnaści nahareła na 1400 rubloŭ, kaža Natalla. Płacić za śviatło taksama niama čym.
«Pajšła ŭ vykankam prasić dapamohi, maŭlaŭ, vielmi ciažkaje ŭ nas materyjalnaje stanovišča. Paabiacali dapamahčy, dać 1400 rubloŭ», — raspaviadaje Natalla Dakuka.
Hrošy vykankam vydzieliŭ, praŭda, tolki 400 rubloŭ.
«700 rubloŭ treba na cehłu, 500 — majstru na piečku, plus usia patrebnaja furnitura: zasłonki i inšaje… Jašče rubloŭ 200-300. Ja pajšła ŭ vykankam. Mnie kažuć: budź zdarova, baba, skažy «dziakuj», što choć heta dali», — uzhadvaje Natalla.
U vyniku 22 sakavika Natalla i Uładzimir Dakuki abvieścili haładoŭku.
«Prezident kryčyć, što kali duža ciažka, to idzicie da ŭładaŭ, a nasamreč heta brachnia i chłuśnia», — pierakananaja Natalla Fiodaraŭna.
Žančyna zajaŭlaje, što nie spynić haładoŭku, pakul na jaje nie źviernuć uvahu. Ci pakul nie pamre.
«My ŭsio žyćcio spadziavalisia na samich siabie, što budziem pracavać, pakul buduć siły, ničoha nie prasili ni ŭ koha. A tut niama pracy, niama ničoha. Što nam rabić?»
-
Zołatava: Roŭna piać hadoŭ tamu adbyłasia žachlivaja ŭ maštabach krainy padzieja
-
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku
-
Za jakija videa ŭ sacsietkach mohuć pryciahnuć da adkaznaści? I razmova nie pra pratesnyja roliki
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku
Kamientary