Marzaluk, Hajdukievič, Dziermant, Špakoŭski žorstka krytykujuć Dekret №3: «Syry, niedapracavany, prypynić dziejańnie»
Čarhovaja pieradača «Sprava pryncypu» na telekanale ANT była pryśviečanaja temie Dekreta №3 ab tak zvanych «darmajedach». Charakterna, što absalutna ŭsie zaprošanyja ekśpierty krytykavali dziejańnie hetaha dakumienta. Amal usie syšlisia ŭ mierkavańni, što ideja była pravilnaj, a voś vykanańnie padkačała.
«Dekret byŭ nakiravany na vyvad cieniavoha biznesu na pavierchniu. Tyja, chto budujuć vialikija damy, jeździać na dobrych mašynach, ale nijak nie ŭdzielničajuć u sacyjalnym žyćci krainy. A atrymałasia ŭsio dakładna naadvarot, — z chodu pačaŭ namieśnik staršyni ŁDPB Aleh Hajdukievič. — Paciarpieli zvyčajnyja ludzi. Ja chaču skazać pra vinu vykanaŭcaŭ. Pa ŭsich abłaściach aby-jak arhanizavanaja praca. Pajšła masavaja rassyłka hramadzianam, jakija nie majuć nijakaha dačynieńnia da hetaha dekretu. Heta zakranuła ludziej, jakich skaracili na vytvorčaści. Jak atrymałasia, my chacieli pakarać samych bahatych — a pakarali samych biednych. U Breście vyjšli ludzi, dyk tam staršynia harvykankama vyjšaŭ da ludziej, a da hetaha ž nivodzin čynoŭnik nie vychodziŭ».
«Pryncyp narmalny. My sapraŭdy chacieli pakarać hetym dekretam tych, chto zajmajecca cieniavym biznesam. My ž sutyknulisia ź nizkaj vykanaŭčaj dyscyplinaj. Nie było nijakaj raboty, — skazaŭ deputat-historyk z Mahilova Ihar Marzaluk. — Ministerstva, jakoje raspracoŭvała dekret, pavinna było zajmacca tłumačalnaj pracaj. U Breście taki «list ščaścia» prychodziŭ byłomu načalniku RUUS — heta što? Maci studenta MHIMA prychodzić list, što syn «darmajed», i jana pavinna dakazvać niešta — heta što?»
«Nie treba aceńvać zamysieł, treba sudzić vykanańnie. Hładka było na papiery, ale zabylisia pra jary. Dakumient syry, nieprapracavany. Jaho dziejańnie na siońniašni momant niemetazhodna, dekret pavinien być prypynieny», — skazaŭ palityčny ahladalnik Alaksandr Špakoŭski, jaki niadaŭna staŭ hierojem skandału.
Prarasijski publicyst Alaksiej Dziermant skazaŭ, što ŭ śviecie časta ŭvodziać «padatak na raskošu», u nas ža ŭsio zrabili naadvarot.
Taksama lohkaja krytyka prahučała ad deputataŭ Pałaty pradstaŭnikoŭ Valeryja Baradzieni i Ihara Kamaroŭskaha. Usie ekśpierty pahadzilisia, što dakumient nieprapracavany.
Pry hetym Marzaluk, Hihin, Hajdukievič i Dziermant nakinulisia na tych, chto ŭznačalvaje pratesty. «Destruktyŭnyja siły», nazyvali ich.
Ciapier čytajuć
Byłoha vajskoŭca z Bresta, jaki viarnuŭsia z Polščy, abvinavacili ŭ «teraryźmie» i adpravili ŭ kałoniju6
Kamientary