Prakuratura Minska raspačała kryminalnuju spravu ŭ dačynieńni da supracoŭnika milicyi za pieravyšeńnie słužbovych paŭnamoctvaŭ pry zatrymańni piedyjatra Dźmitryja Sierady. Jak paviedamiŭ BiełaPAN Sierada, pra heta viadoma ź lista, jaki jon atrymaŭ sa staličnaj prakuratury.
Našumieły incydent zdaryŭsia 4 žniŭnia. Kala vaśmi hadzin ranicy ŭ kvateru lekara ŭvarvalisia nieviadomyja ŭ maskach. Biez zvankoŭ i tłumačeńniaŭ jany stali vybivać ŭvachodnyja dźviery, a taksama spuścilisia z dachu i raźbili škło bałkonnych dźviarej na kuchni. Dźmitryj Sierada biespaśpiachova sprabavaŭ daviedacca, što za ludzi šturmujuć jaho kvateru i čamu. Nieviadomyja ŭvarvalisia ŭ kvateru, pakłali haspadara tvaram u padłohu, załamali ruki za śpinu i nadzieli naručniki. Tolki paśla hetaha ciažarnaj žoncy Sierady paviedamili, što jany ź milicyi, i adviali žančynu ź dziciom u inšy pakoj.
Paźniej vyśvietliłasia, što lekara padazravali ŭ ekshibicyjaniźmie. Praz sutki Sieradu vyzvalili, pryznaŭšy jaho niedatyčnaść, bo paciarpiełaja i śviedka nie apaznali ŭ im złačynca. Sam Sierada raskazaŭ, što ŭ dzień złačynstva, u jakim jaho abvinavačvali, byŭ ź siabrami na rybałcy za 80 km ad Minska.
Pa fakcie zatrymańnia Sierady Śledčy kamitet pravioŭ pravierku, pa vynikach jakoj u raspačynańni kryminalnaj spravy było admoŭlena, a cialesnyja paškodžańni, naniesienyja mužčynu, pryznanyja «niesapraŭdnymi». Paśla paŭtornaj skarhi ŭ SK lekara ŭ raspačynańni kryminalnaj spravy znoŭ było admoŭlena, i Dźmitryj Sierada źviarnuŭsia ŭ prakuraturu Minska.
Adkaz z prakuratury datavany 9 studzienia. U liście paviedamlajecca, što pa vynikach razhladu skarhi rašeńnie SK ab admovie ŭ raspačynańni kryminalnaj spravy admienienaje. U dačynieńni da supracoŭnika Zavodskaha RUUS stalicy raspačataja sprava pa č. 1 art. 426 KK (naŭmysnaje ŭčynieńnie słužbovaj asobaj dziejańniaŭ, jakija vidavočna vychodziać za miežy pravoŭ i paŭnamoctvaŭ, dadzienych joj pa słužbie, što paciahnuła pryčynieńnie škody ŭ bujnym pamiery abo istotnaj škody pravam i zakonnym intaresam hramadzian abo dziaržaŭnym ci hramadskim intaresam (pieravyšeńnie ŭłady abo słužbovych paŭnamoctvaŭ)). Kryminalnaja sprava nakiravanaja načalniku USK pa Minsku dla arhanizacyi papiaredniaha rasśledavańnia.
Ciapier čytajuć
Byłoha vajskoŭca z Bresta, jaki viarnuŭsia z Polščy, abvinavacili ŭ «teraryźmie» i adpravili ŭ kałoniju6
Kamientary