Daškievič zaklikaŭ sabracca kala budynka suda, dzie adbudziecca zakryty praces nad błohieram Džonam Silvieram

A 10:00 14 kastryčnika ŭ Mienskim haradzkim sudzie nad Eduardam Palčysam pačniecca zakryty praces, pra jaki jahonaja žonka Viktoryja napisała: «Šou nie budzie». Chacia ja miarkuju, što biełaruskaje dziaržava robić usio mažlivaje, kab šou było — my tolki pavinny inicyjatyvu hetuju padtrymać.

Zakrytym sudom mianie sudzili ŭ 2006-m hodzie. Heta byŭ sud ci nie pa adzinym palityčnym artykule ŭ našaj krainie — 193.1 albo «dziejnaść ad imia niezarehistravanaj u Biełarusi arhanizacyi». Sud, jak ciapier pamiataju, byŭ viasioły — pad voknami skandavała demanstracyja, a sudździa z prakuroram z voka na voka pierakonvali mianie, jaki ja niebiaśpiečny dla Baćkaŭščyny indyvidum. Ja šče nia byŭ taki daśviedčany ŭ kryminalnych razborkach i na pasiedžańni niešta sprabavaŭ sudździ dakazvać: u apošnim słovie začytvaŭ Bibliju, zaklikaŭ da sumleńnia i rozumu. Prakuror «učityvaja socialnuju opasnosť priestupnika» z dvuch mažlivych hadoŭ prasiŭ dać mnie dva.

Pavialičyć

Pastanova suda, pamiatajecca, była nia mienš fiejeryčnaja. Tak u adnym abzacy pieraličvałasia vina: «dziejnaść ad imia niezarehistravanaj arhanizacyi «Małady Front», jakaja stavić za metu vychavańnie maładoha pakaleńnia biełarusaŭ na padmurku nacyjanalnaj idei i chryścijanskich pryncypaŭ», a ŭ druhim abzacy robicca vysnova: «učityvaja socialnuju opasnosť priestupnika i ličnosť abviniajemoho — połtora hoda». Choć nichto i nie zadumaŭsia, što «ličnaść» u mianie da 2006 hoda była vielmi navat prystojnaja — ja pa 12 hadzin pracavaŭ na rynku i ŭ volny ad pracy čas arhanizoŭvaŭ mirnyja akcyi, paśla jakich mianie mirna nasili ŭ aŭtazak. Ale, jakoje heta było šou — ničoha nie ŭličyli!

Pavialičyć

Tym časam biełaruskuju moładź «vychoŭvajuć» rasiejskija nieanacysty.

Žarty žartami, ale kali razvažać łahična, to i ciapier ciažka razabracca, dla čaho tady režym sprabavaŭ učynić takuju začystku z haniebnymi sudziliščami pa ŭsioj krainie. Ale łahična ŭ karnaj systemie nichto nie razvažaje. Razvažajuć adnoj adzinaj svajoj represiŭnaj źvilinaj: zadušyć, źniščyć, spynić lubaje inšadumstva. Jany dumali, što zakryjuć mianie i dziejnaść Maładoha Frontu tut ža pasyplecca.

I choć mianie zakryli ŭ samaj pravieranaj zonie — škłoŭskaj, režym pajmieŭ advarotny vynik — Małady Front byŭ na adnym sa svaich uzdymaŭ. Niahledziačy na dziasiatki kryminalnych spravaŭ «za dziejnaść ad imia niezarehistravanaj arhanizacyi» moładź praciahvała pracu, a ciaham sudu nada mnoju i inšymi maładafrontaŭcami 1500 čałaviek pastavili svoj podpis pad zajavaj: «Ja — maładafrontaviec», čym kožny padpisant śviedčyŭ: sudzicie hetych — sudzicie i ŭsich nas.

Pavialičyć

Hledziačy na ŭsio heta karnaja systema zadumałasia i nazaŭždy spyniła ŭžyvać suprać hramadzka-palityčnych aktyvistaŭ artykuła 193.1, jaki, de-fakta, znachodzicca ciapier pad niehałosnym maratoryjem. I ŭsio heta dziakujučy samaachviarnaści maładafrontaŭcaŭ i tych, chto prajaviŭ salidarnaść pad čas sudoŭ.

Siońnia ž režym sprabuje spynić tych, chto na hałoŭnym froncie baraćby — infarmacyjnym. I heta nia dziva, bo nia nami ž, a samim žyćciom dakazana: «chto vałodaje infarmacyjaj, toj vałodaje śvietam». Eduard Palčys vielmi dobra vałodaŭ infarmacyjaj, tak dobra, što forumnyja boty pierakonvali adzin adnaho, što 1863ch.com — heta prajekt dziarždepa, a na imia Džon Silvier pracuje admysłovy adździeł CRU. Kali ja zapytvaŭ Eduarda, jak toj usio heta paśpiavaje, toj adkazvaŭ: «Žonka varyć jeści, a ja pišu». Ja byŭ pierakanany, što heta žart i dalej nie raspytvaŭ. Ciapier ža ja sapraŭdy viedaju, što tak i było — Eduard pisaŭ pa viečaroch, kali Viktoryja hatavała viačeru. I voś na adnaho čałavieka, jaki prymusiŭ trymcieć usie specsłužby cełaj «piataj imperyi, što padymajecca z kalen», usia imperyja i abrynułasia.

Usie my, tyja, chto zastaŭsia na voli pavinny damahčysia advarotnaha vyniku — Eduardava słova pavinna zahučać jašče hałośniej, jahonyja artykuły pavinny pieračytvać miljony va ŭsich kutkach byłoj imperyi zła, jahony sajt 1863ch.com pavinien traščać ad napłyvu achvočych napicca praŭdy!

Pavialičyć

Davajcie 14 kastryčnika a 10 ranku padydziem da Mienskaha haradzkoha suda (vuł. Dunina-Marcinkieviča, 1) i dapamožam režymu zrabić šou, jakoje jany tak doŭha rychtavali, ale pakazać, čamuści, chočuć adnamu tolki Eduardu. My ž pavinny pakazać jaho ŭsiamu śvietu. Na šou my pačniem zbor podpisaŭ pad adnym z artykułaŭ Džona Silviera, pad jakim kožny achvočy zmoža pastavić svajo imia i proźvišča, tym samym zaśviedčyŭšy: kožny z nas — Džon Silvier, chočacie pasadzić — sadzicie ŭsich. Jany zachacieli šou? Šou budzie!

• 0
• 0
• 0
• 0
• 0
• 0
• 0
• 0