Na biełaruska-litoŭskaj miažy fury stajać u vialikich čerhach, na ŭkrainskich trasach — błakada FOTA
Dvuchbakovy kanflikt Polščy i Rasii, jaki pryvioŭ da prypynieńnia hruzavych pieravozak pamiž krainami z 1 lutaha, vyliŭsia ŭ čerhi na biełaruska-litoŭskaj miažy.
Dziaržpahrankamitet RB kanstatuje ŭzrastańnie patoku hruzavoha transpartu na litoŭskim napramku biełaruskaj miažy.
U punkcie propusku «Kamienny Łoh» na miažy ź Litvoj u čarzie na vyjezd — 140 hruzavikoŭ, na ŭjezd — 10. Bolš składanaja situacyja ŭ punkcie propusku «Bieniakoni» — na vyjezd ź Biełarusi ŭ Litvu stajać 130 fur, na ŭjezd u Biełaruś ź Litvy — 250 fur. U punkcie propusku «Katłoŭka» ŭ čarzie na vyjezd ź Biełarusi ŭ Litvu — 120 hruzavikoŭ.
«Pakul Rasija i Polšča nie damoviacca pra kvoty dazvołaŭ na prajezd fur, uvieś transpartny patok laža na plečy Biełarusi i Prybałtyki», — rastłumačyŭ TUT.BY pres-sakratar Dziaržpahrankamiteta Biełarusi Alaksandr Ciščanka.
Jon taksama skazaŭ, što situacyja dalokaja ad katastrafičnaj: «My i litoŭskija kalehi kinuli na hetyja napramki dadatkovyja čałaviečyja resursy, čarha nie staić — pavolna ruchajecca».
Nahadajem, čerhi z fur na biełaruska-litoŭskaj miažy apošnim časam istotna pavialičylisia. Pryčyna — adsutnaść pahadnieńnia pamiž Rasijaj i Polščaj: baki nie ŭzhadnili kvoty dazvołaŭ na prajezd fur. Rasijskija pieravozčyki pieranakiravali hruzapatok praź Biełaruś: pieršy napramak bałtyjski, druhi ŭkrainski — kiroŭcy jeduć praź Biełaruś va Ukrainu, a potym u Vienhryju, Słavakiju i dalej.
Situacyja ŭskładniajecca jašče i tym, što va Ukrainie aktyvisty stali błakavać prajezd praz terytoryju krainy nie tolki furam z rasijskimi numarami, ale i litoŭskim, biełaruskim pieravozčykam, jakija viazuć rasijskija tavary. 12 lutaha «błakadniki» vystavili pasty pablizu pahraničnaha punkta propusku «Damanava» (Vałynskaja vobłaść, Ukraina) — Makrany (Bresckaja vobłaść, Biełaruś). Siońnia stała viadoma, što ŭkrainskija aktyvisty vystavili pasty na darohach u Žytomirskaj vobłaści (miažuje z Homielskaj vobłaściu) i Rovienskaj vobłaści (miažuje z Bresckaj vobłaściu). Akramia taho, fury błakujuć i ŭ Zakarpaćci.
Byłoha vajskoŭca z Bresta, jaki viarnuŭsia z Polščy, abvinavacili ŭ «teraryźmie» i adpravili ŭ kałoniju6
Kamientary