Prakuratura Mahiloŭskaj vobłaści nakiravała ŭ abłasny sud kryminalnuju spravu ŭ dačynieńni da 31-hadovaha žychara Kaściukovič, jaki ŭčyniŭ na hlebie siamiejna-bytavych adnosin šerah złačynstvaŭ, u tym liku asabliva ciažkaje.
Jak paviedamiŭ namieśnik načalnika adździeła abłasnoj prakuratury Dźmitryj Šaramiet, ustanoŭlena, što mužčyna z krasavika pa červień hetaha hoda padčas siamiejnych svarak nieadnarazova źbivaŭ svaju 31-hadovuju žonku rukami i nahami, nanosiačy joj paboi i lohkija cialesnyja paškodžańni, a taksama pahražaŭ joj zabojstvam.
U noč z 10 na 11 lipienia ŭ siabie doma jon, znachodziačysia ŭ stanie ałkaholnaha apjanieńnia, padčas svarki z žonkaj z metaj jaje zabojstva z asablivaj žorstkaściu nanios žančynie šmat ŭdaraŭ rukami i nahami pa roznych častkach cieła. Kidaŭ jaje na padłohu i skakaŭ pa joj, razumiejučy, što pryčyniaje žoncy ciažkija pakuty, nanios joj traŭmu hałavy, hrudnoj kletki i žyvata, što ŭskładniłasia traŭmatyčnym šokam, ad jakoha paciarpiełaja pamierła na miescy zdareńnia, paviedamiŭ Šaramiet.
Dziejańni abvinavačanaha orhanam papiaredniaha śledstva kvalifikavanyja na padstavie č. 1 art. 154 KK (katavańnie), art. 186 KK (pahroza zabojstvam), p. 6 č. 2 art. 139 KK (zabojstva, učynienaje z asablivaj žorstkaściu). Za hetyja złačynstvy jamu moža być pryznačanaje pakarańnie ŭ vyhladzie pazbaŭleńnia voli na termin ad 8 da 25 hadoŭ, abo pažyćciovaha źniavoleńnia, abo śmiarotnaj kary.
Papiaredniaje rasśledavańnie hetaj kryminalnaj spravy pravodziła ŭpraŭleńnie Śledčaha kamiteta pa Mahiloŭskaj vobłaści.
Kamientary