U kancy listapada śledčyja orhany zaviaršyli rasśledavańnie kryminalnaj spravy bujnoj złačynnaj hrupy z ustojlivaj ijerarchijaj i dakładnym raźmierkavańniem rolej, jakaja zajmałasia na praciahu amal dvuch hadoŭ raspaŭsiudžvańniem narkotykaŭ u Minsku i Hrodnie.
Ab hetym 1 śniežnia na pres-kanfierencyi paviedamiŭ načalnik upraŭleńnia Śledčaha kamiteta pa Minsku Dźmitryj Kanaplanik.
Ciapier pad vartaj znachodziacca 14 udzielnikaŭ złačynnaj hrupy — žychary Minska i Minskaj vobłaści, u tym liku 24-hadovaja maładaja maci. Bolšaść — niepracujučyja. Byli taksama studenty i indyvidualnyja pradprymalniki. Dziejańni abvinavačvanych kvalifikavanyja pa častkach 1, 3 i 4 art. 328 KK. Ich uzrost u momant učynieńnia złačynstvaŭ — ad 17 da 25 hadoŭ. Materyjały kryminalnaj spravy, rasśledavańnie jakoj doŭžyłasia 14 miesiacaŭ, aformleny ŭ 84 tamy.
Jak skazaŭ načalnik adździeła USK pa Minsku Siarhiej Hamko, pačatku rasśledavańnia spravy pasłužyła znojdzienaja na terytoryi adnoj z daškolnych ustanoŭ stalicy zakładka sa 100 h psichatropu.
U chodzie rasśledavańnia byli zakrytyja try bujnyja internet-mahaziny pa prodažy psichatropaŭ. Ustanoŭlena, što niezadoŭha da zatrymańnia hrupa apłaciła 360 młn. rubloŭ za nabyćcio 6 kh psichatropnych rečyvaŭ. Častku ź ich udałosia kanfiskavać.
Minimalny dachod złačyncaŭ aceńvajecca prykładna ŭ 50 tys. jeŭra. Hrošy zdymalisia z bankamataŭ u Biełarusi, Litvie, FRH i Ispanii.
Jak adznačyŭ pradstaŭnik SK, pry rasśledavańni kryminalnaj spravy śledčym daviałosia sutyknucca z «vielmi surjoznym» šyfravańniem, jakoje vykarystoŭvałasia ŭdzielnikami złačynnaj hrupy. Takoje ž śpiecyjalnaje prahramnaje zabieśpiačeńnie prymianiaŭ były ahient ANB ZŠA Edvard Snoŭden.
Taksama Siarhiej Hamko źviarnuŭ uvahu na toje, što kryminalnuju adkaznaść za niezakonny abarot narkotykaŭ paniasuć nie tolki arhanizatary złačynnaha biźniesu, «zakładčyki» i h.d. — tyja, chto niepasredna «pracavaŭ» ź psichatropami, ale i ludzi, jakija davali im svaje źviestki dla rehistracyi elektronnych kašalkoŭ, bankaŭskich kartak, ź jakich zdymalisia hrošy.
Z dvuma ŭdzielnikami złačynnaj hrupy zaklučana dasudovaje pahadnieńnie, i jany aktyŭna supracoŭničali sa śledstvam.
Kryminalnaja sprava pieradadziena ŭ prakuraturu dla nakiravańnia ŭ sud.
Byłoha vajskoŭca z Bresta, jaki viarnuŭsia z Polščy, abvinavacili ŭ «teraryźmie» i adpravili ŭ kałoniju6
Kamientary