AHP praviała kala Kamaroŭskaha rynku zbor podpisaŭ suprać uščylnienaj zabudovy
Aktyvisty Abjadnanaj hramadzianskaj partyi i jaje staršynia Anatol Labiedźka 3 listapada źbirali kala Kamaroŭskaha rynku ŭ Minsku podpisy suprać uščylnienaj zabudovy stalicy i za praciah terminaŭ abmierkavańnia hienpłana.
«Dumaju, ludziam nie padabajecca, što robiać ułady z uščylnienaj zabudovaj u Minsku. Jość miescy, naprykład, z adnapaviarchovaj zabudovaj, jakija čynoŭniki chočuć začyścić. Heta niespraviadliva, — zajaviŭ Labiedźka. — Tak, ludziej, jakija žyvuć na vulicy Cimirazieva, vysialajuć u niejkija niebaskroby na ŭskrainie. Ale nichto nie prapanavaŭ im, naprykład, ziamlu ŭ Vieśnincy i Drazdach. Tam jaje prapanavali hienprakuroru, ministram. A čamu ŭ Łukašenki nie moža być susiedam ślesar z traktarnaha zavoda, a tolki ministr ź jaho atačeńnia?»
Palityk miarkuje, što «nivodnaje ŭščylnieńnie nie pavinna adbyvacca biez udziełu ludziej». «Toje nibyta ŭsienarodnaje abmierkavańnie, jakoje zaraz adbyvajecca, zroblena tak, kab nichto ŭ im nie ŭdzielničaŭ. Ułady prapanoŭvajuć aznajomicca z płanami zabudovy Minska ŭ niazručny čas, u nievialikim pamiaškańni. Dla ich heta farmalnaść», — skazaŭ jon.
Labiedźka zaznačyŭ, što prablema ŭščylnienaj zabudovy ŭžo stała zakranać nie tolki asobnyja hramadskija inicyjatyvy. «Dumaju, dla AHP heta prablema budzie druhoj pa značnaści paśla prablemy novych pracoŭnych miescaŭ», — skazaŭ jon.
Pavodle słoŭ Labiedźki, «sabranyja podpisy — heta materyjał, ź jakim možna i treba pracavać». «My chacieli b jak maha bolš ludziej zrabić kryšku bolš aktyŭnymi, kab jany vyjšli za miežy dyskusii ŭ svajoj ułasnaj kvatery. Heta hałoŭnaje. Nu i viadoma heta pasył haradskim uładam: kali sotni, tysiačy ludziej padpisvajucca, heta ihnaravać nielha», — zaznačyŭ jon.
Aprača taho, skazaŭ Labiedźka, partyja, kali pravodzić zbor podpisaŭ u centry Minska, chacieła pahladzieć, «ci nie zvužajecca prastora svabody, za jakuju my zaraz zmahajemsia».
Za pracesam zboru podpisaŭ nazirali pradstaŭniki pravaachoŭnych orhanaŭ u cyvilnym, adnak nie ŭmiešvalisia.
Ciapier čytajuć
U archivach SBU znajšlisia dakumienty, jak savieckija śpiecsłužby zavierbavali emisara AUN, ale ŭkrainskaje padpolle heta vykryła i zabiła zdradnika88
Kamientary