U Mahilovie vyzvalili aktyvistaŭ, addali ściah i vybačylisia
Alaksandr Šaŭcoŭ dy Valancina Ščetnikava, siabry inicyjatyŭnaj hrupy vyłučenki na prezidenctva Taćciany Karatkievič, na voli.
Ich zatrymali la bujniejšaha ŭ Mahilovie Vilenskaha rynku, kali jany stajali ŭ pikiecie i źbirali podpisy ŭ padtrymku pretendentki. Incydent ź milicyjantami adbyŭsia, kali ŭ abłasnym centry znachodziłasia sama Taciana Karatkievič. Jana zajaviła, što ŭpieršyniu sutyknułasia z tym, kab u milicyju zabirali siabroŭ jejnaj inicyjatyŭnaj hrupy.
Šaŭcoŭ navažyŭsia zapytać, na jakoj padstavie amapaŭcy zabirajuć bieł-čyrvona-bieły ściah, i jaho zatrymali. Jak śćviardžaje aktyvist, u mašynie i ŭ pastarunku supracoŭniki milicyi jaho źnievažali.
«Heta była pravakacyja suprać našaha pikietu. Jany pryjechali z uklučanaj mihałkaj. Vyskačyli z mašyny, niby byŭ zachop banka i adrazu kinulisia zryvać ściah, — skazaŭ Alaksandar Šaŭcoŭ. — Kali ja zapytaŭ u ich, na jakoj padstavie jany zryvajuć ściah, to mnie skazali: projdziem z nami i my patłumačym».
«U mašynie źnievažali, akcentujučy ŭvahu na maju prynaležnaść da BNF. Dapytvalisia, što my tut robim? Naciskali, što my chočam utvaryć u Biełarusi toje, što va Ukrainie. U pastarunku zahadali źniać kašulu i nahavicy da kalena. Ahladali, vidać, šukali niejkija tatuiroŭki. Sunialisia milicyjanty, kali pryjechaŭ ich načalnik», — davodziŭ aktyvist.
Valancinu Ščetnikavu zatrymali nieŭzabavie paśla Šaŭcova, ale da pastarunku nie davieźli.
Jak jana apaviadaje, paśla razmovy pa telefonie sa svaim načalstvam jaje viarnuli na toje ž miesca, ź jakoha zabrali. Ludzi, zajaŭlaje aktyvistka, paśla incydentu ź milicyjaj daloka abychodzili pikiet.
Pavodle Ščetnikavaj, kali jana davodziła milicyjantam, što maje zakonnaje prava vystaŭlać pikiet, bo prachodzić pieradvybarčaja kampanija, tyja nie razumieli, pra što havorka.
U pastarunak vyzvalać Šaŭcova pryjechała sama Taciana Karatkievič. Sabrałasia niamała i žurnalistaŭ.
«Patłumačyli, što im heta treba było zrabić, kab vyjavić asobu. Heta całkam ichniaja inicyjatyva. Kapitan milicyi mnie skazaŭ, što niama padstavaŭ zatrymlivać Šaŭcova i nie było, kab zdymać ściah. Spadziajusia, što ŭ hetym horadzie bolš nia budzie takich vypadkaŭ. Heta duža nie pryjemna. Takaja situacyja ŭpieršyniu zdaryłasia, kali hetak pavodziać siabie supracoŭniki milicyi», — skazała spadarynia Karatkievič.
«U mianie buduć sustrečy ŭ Białyničach i Škłovie, pahladzim, jakaja tam budzie reakcyja. Pakul ža supracoŭniki mahiloŭskaj milicyi za svaje dziejańni vybačalisia», — dadała Taciana Karatkievič i zaznačyła, što incydent u Mahilovie nie pakinie biez uvahi.
Zabrany ź pikieta ściah milicyjanty addali, ale, pavodle aktyvistaŭ, zbor podpisaŭ im udałosia sarvać.
Ciapier čytajuć
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»1111
Kamientary