Paŭsiudna akazvać padtrymku pradpryjemstvam dziaržava nie maje namieru, zajaviŭ staršynia praŭleńnia Nacyjanalnaha banka Pavieł Kałaur, adkazvajučy na pytańni BiełaPAN na pres-kanfierencyi 4 žniŭnia ŭ Minsku.
«Dziaržava pavinna akazvać padtrymku ŭ apošnim vypadku, i to vybaračna», — padkreśliŭ Kałaur.
U toj ža čas, kanstatavaŭ jon, subjekty haspadarańnia sfarmiravali čakańni, što dziaržava ich padtrymaje. «Mnohija pradpryjemstvy čakajuć, što atrymajuć padtrymku dziaržavy. Ale my razumiejem, što mahčymaści dziaržavy abmiežavanyja, ź inšaha boku, nieabchodna zaachvočvać pradpryjemstvy samastojna šukać vyjście ź situacyi, što skłałasia», — skazaŭ Kałaur.
Na jaho dumku, mahčymaści palapšeńnia ekanamičnaha stanovišča ŭ realnym siektary isnujuć. «Mahčymaści pradpryjemstvaŭ, u pryvatnaści, źviazanyja ź ich restrukturyzacyjaj u častcy źnižeńnia vydatkaŭ i aptymizacyi biźnies-pracesaŭ», — rastłumačyŭ hałoŭny bankir.
U svaju čarhu namieśnik staršyni praŭleńnia Nacbanka Dźmitryj Łapko paviedamiŭ, što situacyja ŭ realnym siektary pastajanna razhladajecca ŭ miežach tak zvanaha Kłuba kredytoraŭ, u jaki ŭvachodziać pradstaŭniki pradpryjemstvaŭ, bankaŭ i orhanaŭ dziaržkiravańnia.
«Dziejnaść Kłuba kredytoraŭ skiravanaja na źnižeńnie ryzykaŭ dla kredytoraŭ i pazyčalnikaŭ. Pieršapačatkova ŭ miežach kłuba razhladałasia situacyja na 106 pradpryjemstvach, jakija vystupajuć bujnymi pazyčalnikami. Paśla ich kolkaść była pašyranaja. Kłub praciahvaje svaju pracu, i pry nieabchodnaści pravodziacca pasiadžeńni, kali treba razhledzieć situacyju ŭ realnym siektary», — skazaŭ Łapko.
Nahadajem, u kancy červienia Alaksandr Łukašenka pryniaŭ šerah ukazaŭ z metaj refinansavańnia zavinavačanaści bujnych pradpryjemstvaŭ mašynabudavańnia pierad bankami. Dziaržava dała harantyi bankam u častcy pahašeńnia zavinavačanaści subjektaŭ haspadarańnia.
Kamientary