U Mahilovie na Dniapry spynienaje sudnachodstva. Miascovy račny port niasie straty. Uračysta adkryty sioleta pryčał dla prahułačnych kataraŭ niezapatrabavany. Na prykole i sami katary. Stała mienš u race ryby. Pryčyna — abmialeńnie raki. Dva hady zapar na Dniapry nie było dobrych pavodak. Sioletniaje śpiakotnaje leta situacyju pahoršyła. Padzieńnie ŭzroŭniu vady pryviało da spynieńnia sudnachodstva. Sudny stajać na prykole ŭ miascovym račnym porcie.
«Niama vady — značyć, niama kankretnaj pracy. Niasiom straty. Raschodnaja častka ŭzrastaje, — tłumačyć pradstaŭnik administracyi porta. — U arendu addali sudna ŭ Oršu, i ciapier i jano, i barža zaviśli. Da jakoha času, nichto nie viedaje. Znoŭ ža niasiom raschody dadatkovyja. Mostabudaŭničaje pradpryjemstva — taksama. Sudna ž treba achoŭvać. U Mahilovie kala Puškinskaha mosta stajać dva krany i tam, vidać, zastanucca da zimy abo da vialikaj vady. Ich asadka ŭ vadu da adnaho mietra dziesiaci santymietraŭ, a hłybinia ciapier — da 60 santymietraŭ. Jak my ich u port dastavim?»
Pryčał, jaki abyšoŭsia ŭ paŭtara miljarda rubloŭ i ŭračysta byŭ sioleta adkryty ŭ mai, zastajecca niezapatrabavanym. Vada ad jaho adstupiła na paŭtara mietra. Na prykole zastajucca i prahułačnyja katary. Rybaki śćviardžajuć, što rečyšča ahaliłasia da dvuch mietraŭ. Takoha raniej nie nazirałasia. Zapavoliłasia i račnaja płyń. Vodaraści, jakija chavała vada raniej, apynułasia na pavierchni.
«Sioleta nie było pavodki. A naprykład, pazaminuły hod dyk vada padymałasia na 2,5-3 mietry, — tłumačyć situacyju adzin z rybakoŭ. — U pavodku vymyvajucca jaminy pad vadoj. Kali pavolnaja płyń i niama pavodki, to jaminy zamyvajucca i ryba sychodzić. Vialikaj ryby niama ažno da samaha Bychava. Kormu dla jaje, vidać, niama i vady mała».
«Dva hady nie było pavodki, i ryba ŭsia syšła, — narakaje jašče adzin rybak. — Dva hady nierastu nie było. Kali treci hod tak budzie, to Dniapro pieraŭtvorycca ŭ bałota»
«Kab Dniapro padniaŭsia, treba, kab daždžy ładnyja išli tydzień. Raka papaŭniajecca za košt hruntovych vod, a ich uzrovień taksama staŭ mienšy. Ciapier i čarviaka adšukać ciažka», — praciahvaje surazmoŭca.
«Značna źmialeŭ Dniapro. Bačycie, mieli ŭtvarylisia, — dałučajecca da hutarki jašče adzin rybak. — Zabrudžana duža raka. Ciapier uvieś brud vylez. Jakaja u im moža być ryba? Usio ŭ butelkach. Kamiery, pakryški — čaho tolki nie znojdzieš».
Śpiecyjalisty z hidramietcentra supakojvajuć: katastrafičnaha ŭ abmialeńni raki niama, nizki ŭzrovień vady źviazany ź siezonnymi chistańniami.
«Kali pojduć apadki, to ŭzrovień padymiecca. U nas ža i ŭzimku śniehu nie było. Daždžoŭ i ŭviesnu i ŭletku — taksama. Kali-niebudź razaljecca Dniapro i stanie narmalna. Padziemnyja vody taksama spadajuć. Našy bałoty pierasychajuć. Tamu daždžy patrebnyja nie tolki dla Dniapra, ale dla ŭsich», — paviedamili ŭ hidramietcentry.
Dniami padzieńnie ŭzroŭniu vady ŭ Dniapry dasiahnuła rekordnaj adznaki za ŭsie hady nazirańnia za rakoj — minus 23 santymietry. Letaś było minus 13. Nazirańni viaducca z 1876 hoda.
Kamientary