Liberalna-demakratyčnaja partyja Biełarusi budzie vyłučać na prezydenckija vybary svajho lidera — Siarhieja Hajdukieviča. Pra heta zajaviŭ siońnia pieršy namieśnik staršyni partyi, syn Siarhieja Hajdukieviča — Aleh.
Hajdukievič-małodšy skazaŭ, što pa šerahu pytańniaŭ ŁDPB padtrymlivaje dziejnaha kiraŭnika dziaržavy. Ale razam z tym u partyi jość i surjoznyja razychodžańni z Alaksandram Łukašenkam.
Karespandent Svabody najpierš zapytaŭsia: čamu siońnia presavuju kanferencyju pad nazvaj «Usia praŭda pra prezydenckija vybary» pravodzić nie kandydat na prezydenta? Na heta Aleh Hajdukievič adkazaŭ, što staršynia partyi ciapier u Maskvie, dzie viadzie adpaviednyja pieramovy z rasiejskimi kalehami.
Aleh Hajdukievič zajaviŭ, što partyja nie padzialaje padychody Alaksandra Łukašenki da ekanomiki. Tut patrebnyja kardynalnyja reformy. Jany naśpieli i ŭ palityčnaj sfery. Vybary ŭ parlament, jak ličać u ŁDPB, pavinny napałovu prachodzić pa partyjnych śpisach.
«I tady imhnienna ŭsie marhinalnyja palityčnyja siły pamruć. Jość prafsajuzy, jość «Biełaja Ruś», žanočyja, moładzievyja arhanizacyi. Ale hetaha mała. Tamu što ŭsio heta nie apazycyjnyja struktury. Biez apazycyi raźvićcio dziaržavy budzie tarmazicca. Patrebnyja pradstaŭniki apazycyi ŭ orhanach ułady».
Aleh Hajdukievič zajaviŭ, što ŁDPB nia bačyć pahrozy suverenitetu Biełarusi ni z boku Rasiei, ni z boku Eŭraźviazu:
«Ciapier tema numar 1 va ŭsich palitykaŭ — niezaležnaść Biełarusi. I ja za niezaležnaść i za suverenitet. I prezydent za niezaležnaść i suverenitet. Ale my nia bačym pahrozy suverenitetu Biełarusi ni z boku Rasiei, ni z boku Eŭrapiejskaha Źviazu. Usie — za niezaležnaść i suverenitet.
Mnohija kažuć pra «zialonych čałaviečkaŭ». Heta nia strašna da toj pary, pakul u krainie dobra raźvivajecca ekanomika. A jana ciapier raźvivajecca drenna, i heta pieršaja prablema.
I druhaja — kali prychodziać «zialonyja čałaviečki»? Kali ŭ krainie niama ŭłady».
Pavodle Aleha Hajdukieviča, na prezydenckich vybarach 2015 hodu pieršy favaryt — heta Alaksandar Łukašenka. Druhi — Siarhiej Hajdukievič. A treciaha, na jahonuju dumku, niama naahuł.
Pakolki ŭ Biełarusi vybaraŭ u sapraŭdnym razumieńni hetaha pracesu ŭžo daŭno niama, to ŭsie razmovy pra favarytaŭ i ŭdzielnikaŭ kampanii — heta tolki častka palityčnaha spektakla, — ličyć sustaršynia arhkamitetu ŭ spravie stvareńnia partyi Biełaruskaj chryścijanskaj demakratyi Pavał Sieviaryniec:
«Rasceńvać surjozna takija zajavy nie vypadaje. Pa-pieršaje, z pryčyny farsavaści tak zvanych vybaraŭ. Pa-druhoje, z pryčyny asoby zajaŭnika. Siarhiej Hajdukievič za apošnija 20 hadoŭ u Biełarusi ŭžo dosyć viadomy.
Vybaraŭ niama. Ale režym robić vyhlad, što adbudziecca čarhovaje lehitymnaje abrańnie na čarhovy termin niaźmiennaha kiraŭnika Łukašenki. Dziela hetaha rychtujucca falsyfikacyi. I tamu zadača biełaruskaha narodu, niezaležnaha hramadztva — hetyja falsyfikacyi ŭskryć i nie dapuścić lehitymizacyi hetaha niezakonnaha režymu. Nie dapuścić tryjumfu biezzakonnaści ŭ Biełarusi.
Tamu pažadana ŭ hetym naahuł nia ŭdzielničać».
Kamientary