Biełaruś pryniata ŭ Bałonski praces

DPA

Biełaruś dałučyłasia da Bałonskaha pracesu i ŭstupiła ŭ Jeŭrapiejskuju prastoru vyšejšaj adukacyi (JEPVA). Pra heta było abvieščana 14 maja ŭ Jerevanie na Kanfierencyi ministraŭ adukacyi krain JEPVA i forumie pa Bałonskaj palitycy.

Padčas dyskusii ab ustupleńni Biełarusi niekatoryja ŭdzielniki kanfierencyi vykazali zaniepakojenaść. Ministry adukacyi Narviehii, Šviecyi, Niderłandaŭ i Isłandyi zajavili pra nieabchodnaść vykanańnia Biełaruśsiu ŭmoŭ darožnaj karty pa dałučeńni da Bałonskaha pracesu.

Pradstaŭnik Šviecyi, u pryvatnaści, padkreśliła, što adčuvaje svaju adkaznaść za pašyreńnie studenckich i akademičnych svabodaŭ u Biełarusi, tamu, na jaje dumku, «vielmi važna, kab kraina adpaviadała hetaj darožnaj karcie».

A ministr adukacyi Isłandyi zajaviŭ: «Darožnaja karta — heta nie prapanova, a patrabavańnie, jakoje pavinna być vykanana. Važna, kab usie jaje ŭmovy byli vykananyja jak minimum. My pavinny vielmi ŭvažliva sačyć za tym, što adbyvajecca ŭ Biełarusi, ci vykonvajucca tam akademičnyja svabody, pryncypy mabilnaści i ŭ cełym pravy čałavieka».

Zajaŭku na dałučeńnie da Bałonskaha pracesu i dałučeńnie da JEPVA Ministerstva adukacyi Biełarusi nakiravała ŭ 2014 hodzie. U pačatku krasavika hetaha stała viadoma, što biełaruskaje pytańnie ŭklučana ŭ paradak dnia, i kiraŭnik Minadukacyi Michaił Žuraŭkoŭ atrymaŭ zaprašeńnie na kanfierencyju ŭ Jerevan.

Biełaruś ustupiła ŭ Bałonski praces z druhoj sproby.

Pieršuju zajaŭku mierkavałasia razhledzieć jašče ŭ krasaviku 2012 hoda na samicie ministraŭ adukacyi JEPVA. Adnak pry padrychtoŭcy samitu Bałonskaja rabočaja hrupa vyrašyła źniać zajaŭku Biełarusi z paradku dnia ŭ suviazi ź nievykanańniem krainaj takich pryncypaŭ Bałonskaha pracesu, jak akademičnaja svaboda, instytucyjnaja aŭtanomija i studencki ŭdzieł u kiravańni vyšejšaj adukacyjaj.

Kiraŭnictva Minadukacyi Biełarusi, sa svajho boku, nieadnarazova zajaŭlała, što pretenzii «lažać nie ŭ śfiery adukacyi, a ŭ inšaj śfiery», i što Biełaruś daŭno hatovaja da ŭstupleńnia ŭ Bałonski praces. Pry hetym ministr adukacyi nie sumniavaŭsia ŭ tym, što čarhovaja sproba dałučeńnia budzie paśpiachovaj. «Mnie zdajecca, ja navat upeŭnieny, što ŭ hetym hodzie ŭ nas usio atrymajecca. I my spakojna, bieź mituśni staniem členami Bałonskaha pracesu», — zajaviŭ Michaił Žuraŭkoŭ niezadoŭha da pajezdki ŭ stalicu Armienii.

Kamientujučy pryniataje siońnia ŭ Jerevanie rašeńnie, jon nazvaŭ dałučeńnie Biełarusi da Bałonskaha pracesu «važnym i adkaznym krokam u raźvićci nacyjanalnaj sistemy adukacyi», jaki «adlustroŭvaje vysoki ŭzrovień biełaruskaj sistemy adukacyi i stavić pierad nami vielizarnyja zadačy pa jaje raźvićciu i abnaŭleńniu».

«Uklučeńnie nas u Jeŭrapiejskuju prastoru vyšejšaj adukacyi adlustroŭvaje pryznańnie suśvietnaj hramadskaściu biełaruskaj sistemy vyšejšaj adukacyi i paćviardžaje fakt taho, što nacyjanalnaja madel kankurentazdolnaja i zmoža intehravacca ŭ suśvietnuju adukacyjnuju prastoru», — cytuje ministra pres-słužba Minadukacyi Biełarusi.

Žuraŭkoŭ padkreśliŭ, što «stratehija raźvićcia nacyjanalnaj sistemy adukacyi zasnavana na mižnarodnaj intehracyi, uciahvańni ŭ praces abnaŭleńnia nacyjanalnaj sistemy adukacyi maksimalna šyrokaha koła zacikaŭlenych bakoŭ, uklučajučy pracadaŭcaŭ, pradstaŭnikoŭ studenckaha samakiravańnia i mižnarodnych ekśpiertaŭ».

• 0
• 0
• 0
• 0
• 0
• 0
• 0
• 0