Kaeficyjent šlubnaści ŭ Biełarusi — adzin z samych vysokich u Jeŭropie
Kaeficyjent šlubnaści nasielnictva ŭ Biełarusi — adzin z samych vysokich u Jeŭropie. Ab hetym paviedamiła na pres-kanfierencyi namieśnik načalnika adździeła narodanasielnictva, hiendarnaj i siamiejnaj palityki Ministerstva pracy i sacyjalnaj abarony Maryna Arciomienka.
Pavodle słoŭ śpiecyjalista, šlubna-siamiejnyja pavodziny charaktaryzujucca schilnaściu da ŭziaćcia šlubaŭ, ich aficyjnaj rehistracyi. Ahulny kaeficyjent šlubnaści ŭ respublicy ŭ 2014 hodzie skłaŭ 8,9 na 1000 čałaviek nasielnictva (u 2013 hodzie — 9,2 pramile).
Źmianiajecca ŭzrostavaja madel naradžalnaści: pytańni stvareńnia siamji i naradžeńnia dziaciej časta adkładvajucca moładździu na bolš stałyja hady žyćcia. Dla respubliki charakterna tendencyja pavieličeńnia siaredniaha ŭzrostu žančyn pry ŭstupleńni ŭ pieršy šlub. Kali ŭ 2000 hodzie ŭpieršyniu ŭstupali ŭ šlub žančyny va ŭzroście 22,8 hoda, mužčyny — 25 hadoŭ, to ŭ 2014 hodzie siaredni ŭzrost žančyn, jakija ŭstupili ŭ pieršy šlub, skłaŭ 25,3 hoda, mužčyn — 27,4 hoda.
Nazirajecca źnižeńnie kolkaści razvodaŭ pry adnačasovym źnižeńni kolkaści ŭziatych šlubaŭ. U 2014 hodzie kolkaść šlubaŭ skłała 83,9 tys. (u 2013-m — 87,1 tys.), razvodaŭ — 34,9 tys. (u 2013-m — 36,1 tys.). Kaeficyjent razvodaŭ u minułym hodzie skłaŭ 3,7 pramile (u 2013-m — 3,8 pramile).
U minułym hodzie ŭ respublicy naradziłasia 118,5 tys. dziaciej, što źjaŭlajecca samym vysokim pakazčykam za apošnija 20 hadoŭ. U studzieni-sakaviku biahučaha hoda pazityŭnyja tendencyi naradžalnaści zachoŭvajucca — u respublicy naradziłasia 27,8 tys. dziaciej — na 122 dziciaci bolš, čym u anałahičnym pieryjadzie minułaha hoda.
Pavodle danych pierapisu nasielnictva 2009 hoda, u Biełarusi pražyvaje amal 2,7 młn siemjaŭ, ź ich 1,2 młn (amal 45 pracentaŭ) majuć dziaciej va ŭzroście da 18 hadoŭ (pavodle pierapisu 1999 hoda — 56 pracentaŭ siemjaŭ). Na 1 studzienia 2015 hoda kolkaść nasielnictva respubliki skłała 9 młn 480,9 tys. čałaviek, ź ich 4 młn 409,2 tys. mužčyn i 5 młn 71,7 tys. žančyn. Na 1000 mužčyn prypadaje 1150 žančyn (siarod haradskoha nasielnictva — 1167, siarod sielskaha — 1095).
«Naša kraina nie maje značnych pryrodnych bahaćciaŭ, asnoŭny jaje resurs — heta čałaviečy patencyjał, asnova jakoha zakładvajecca ŭ siamji. Ad siamji zaležyć usio: i ekanomika, i dabrabyt, i adukacyja, i maralnaść u hramadstvie», — skazała Maryna Arciomienka.
Kamientary