Akazvajecca, pry adličeńni studenta administracyja niby nia vykanała ŭsie pracesualnyja dziejańni. Naprykład, niapravilna byli rasstaŭleny koski, kropki.
Nahadajem, student treciaha kursa matematyčnaha fakulteta byŭ adličany 7 vieraśnia 2007 hoda. Z.Žaleźničenka źjaŭlajecca vydatnikam vučoby i nie mieŭ propuskaŭ zaniatkaŭ biez pavažlivaj pryčyny. Matyvam jaho adličeńnia stała rašeńnie haspadarčaha suda ab administracyjnaj adkaznaści «za niezakonnuju pradprymalnickuju dziejnaść» — raspaŭsiudžvańnie biletaŭ na kancert biełaruskich bardaŭ biez rehistracyi. 16 studzienia sud Centralnaha rajona Homiela admianiŭ zahad rektara univiersiteta imia F.Skaryny ab adličeńni Z.Žaleźničenki. Taksama sud abaviazaŭ VNU adnavić studenta paśla ŭvachodžańnia ŭ zakonnuju siłu hetaha rašeńnia.
Staršynia prafkama studentaŭ Nadzieja Kołtyšava i načalnik jurydyčnaha adździeła VNU Valeryj Niedastup paviedamili studentam, jakija ŭdzielničajuć u pasiadžeńni prezidyuma prafkama, što pa rašeńni suda Z.Žaleźničenka byŭ adnoŭleny va univiersitecie. Načalnik juradździeła univiersiteta traktavaŭ rašeńnie suda tak, što pry adličeńni studenta administracyja VNU nibyta nie vykanała ŭsie pracesualnyja dziejańni. Pavodle jaho słoŭ, byli, u pryvatnaści, dapuščany niekatoryja niedakładnaści — niapravilna rasstaŭleny koski, kropki. Taksama V.Niedastup zaznačyŭ, što Z.Žaleźničenka, budučy adličanym z univiersiteta, učyniŭ drobnaje chulihanstva, za što byŭ pakarany administracyjnym aryštam.
D.Žaleźničenka vystupiŭ pierad svaimi kalehami i raskazaŭ ab akaličnaściach jaho aryštu i sudzie, jaki adbyŭsia 18 vieraśnia. Nahadajem, jaho zatrymali supracoŭniki milicyi pa padazreńni va ŭčynieńni zhvałtavańnia, a paźniej skłali pratakoł «za niecenzurnuju łajanku». Jon byŭ pakarany vaśmisutačnym aryštam.
N.Kołtyšava prapanavała studentam prahałasavać za mahčymaść adličeńnia studenta z farmuloŭkaj «ličyć znachodžańnie va univiersitecie Z.Žaleźničenki niemetazhodnym i zhadzicca z mahčymaściu jaho adličeńnia». Siem studentaŭ padtrymali prapanovu, piać byli suprać «mahčymaha adličeńnia».
«Dumaju, što zahad ab novym adličeńni moža być padpisany rektaram užo siońnia, śpieška administracyi tłumačycca tym, što na 23 studzienia mnie ŭručyli pozvu ab jaŭcy na pryzyŭny punkt dla słužby ŭ armii. Taksama śpiešku možna rastłumačyć tym, što i minuły raz, i ciapier administracyja dziejničaje niepravamierna, i kali mianie zabiaruć u armiju, mnie heta budzie bolš ciažka asprečyć i dakazać, jak ja zrabiŭ heta ŭ pieršy raz», — padkreśliŭ u intervju BiełaPAN Z.Žaleźničenka.
Z.Žaleźničenka ličyć svajo adličeńnie palityčna matyvavanym, bo jon źjaŭlajecca namieśnikam staršyni hramadskaj arhanizacyi «Tałaka» i namieśnikam staršyni maładziožnaha kryła Partyi BNF «Moładź BNF». Na praciahu čatyroch miesiacaŭ były student abskardziŭ u rajonnym i abłasnym sudach zahad ab adličeńni. 16 studzienia sud Centralnaha rajona Homiela admianiŭ zahad rektara ab adličeńni i zadavoliŭ skarhu Z.Žaleźničenki.
Kamientary