U Breście ŭłady zabaranili ŭsie pikiety suprać finansavaha kryzisu ŭ krainie
U Breście ŭłady zabaranili ŭsie pikiety za adstaŭku prezidenta i suprać finansavaha kryzisu ŭ krainie.
Jak paviedamiŭ adzin z zajaŭnikaŭ akcyj namieśnik staršyni Abjadnanaj hramadzianskaj partyi Uładzimir Vujek, aktyvisty i prychilniki partyi płanavali 17 studzienia pravieści 18 pikietaŭ. Metaj akcyj było patrabavańnie adstaŭki kiraŭnika dziaržavy, vinavataha, na dumku arhanizataraŭ, u valutna-finansavym kryzisie ŭ krainie; realizacyja Antykarupcyjnaj płatformy apazicyi; papularyzacyja novaha ekanamičnaha kursu, raspracavanaha AHP.
«Pa čatyry pikiety płanavalisia ŭ parku voinaŭ-internacyjanalistaŭ i na stadyjonie «Łakamatyŭ», jakija vyznačanyja harvykankamam dla takich mierapryjemstvaŭ. Jašče dziesiać — na inšych placoŭkach, u pryvatnaści kala bujnych handlovych abjektaŭ horada. U kožnym pikiecie płanavalisia 20 udzielnikaŭ», — adznačyŭ Vujek.
Pavodle jaho słoŭ, u praviadzieńni pikietavańnia ŭ parku voinaŭ-internacyjanalistaŭ i na stadyjonie «Łakamatyŭ» admoŭlena na toj padstavie, što nie vykananyja terminy padačy zajaŭ na praviadzieńnie akcyj. Astatnija pikiety zabaronienyja, bo jany płanavalisia ŭ nie dazvolenych dla hetaha ŭładami miescach.
«Ja liču, kali b padadzienyja nami dakumienty na hetyja pikiety i adpaviadali ŭsim ustanoŭlenym normam, čynoŭniki znajšli b farmalnyja pryčyny dla ich zabarony. Ułady bajacca akcyj pratestu i robiać usio, kab nie dapuścić publičnaha vykazvańnia prablem, jakija chvalujuć žycharoŭ rehijona», — zajaviŭ palityk.
Raniej lidar AHP Anatol Labiedźka paviedamiŭ, što ŭłady masava nie dazvalajuć praviadzieńnie pikietaŭ 17 i 25 studzienia. Usiaho byli padadzienyja 74 zajaŭki.
Kamientary